Nisura Mataiʼo
9 Möi ia yawa ba dundraha, isawa mbanuania.*+ 2 Laʼohe khönia ndra matua sombuyu-mbuyu töla si no lafadölö ba gaso. Börö me iʼila wa mamati ira, imane Yesu khö ndra matua sombuyu-mbuyu töla andrö, ”Böi aombö dödöu nogu! No teʼefaʼö horöu.”+ 3 So ösa ndra sangila amakhoita lamane tödöra, ”Sangoʼaya Lowalangi niha daʼa.” 4 Iʼila zi so ba dödöra Yesu. Andrö imane, ”Hana wa lö sökhi dödömi?+ 5 Hezo zabölö aoha wangumaʼö, ’No teʼefaʼö horöu,’ mazui, ’Faoso ba ofanö’?+ 6 Hizaʼi, enaʼö aboto ba dödömi wa so kuaso ba Nono niha wangefaʼö horö ba gulidanö . . . ” Aefa daʼö, imane khö zombuyu-mbuyu töla andrö, ”Faoso, fazawa gasomö, ba angawuli ba nomo.”+ 7 Ba maoso niha andrö, mangawuli ia ba nomonia. 8 Ahöli-höli dödö niha sangila, lasuno Lowalangi sameʼe faʼabölö simane daʼö ba niha.
9 Lö ara, mofanö Yesu moroi ba daʼö. Ba wofanönia iʼila samösa ndra matua sotöi Mataiʼo si dadao ba gödo pajak. Imane khönia Yesu, ”Oʼö ndraʼo.” Mosindro Mataiʼo, iʼoʼö Yesu.+ 10 Aefa daʼö, manga Yesu ba nomo Mataiʼo. Ato zohalöwö ba gödo pajak hegöi niha sebua horö si tohare, ba fao ira wemanga khö Yesu awö ndra nifahaʼönia.+ 11 Me laʼila daʼö, lamane ira Farizaiʼo khö ndra nifahaʼö Yesu, ”Hana wa fao zamahaʼö yaʼami andrö wemanga khö ndra sanugi pajak awö zebua horö?”+ 12 Me irongo daʼö Yesu, imane khöra, ”Tenga ba niha sabölö moguna doto, hizaʼi ba niha sofökhö.+ 13 Miʼofanö, miʼangeragö geluaha wehede daʼa, ’Faʼahakhö dödö zomasido, tenga sumange nitunu.’+ Tenga ba wogaoni niha satulö möi ndraʼo, hizaʼi ba wogaoni niha sebua horö.”
14 Aefa daʼö, möi khönia ndra nifahaʼö Yohane ba lasofu, ”Hana wa lö fuasö ndra nifahaʼömö simane yaʼaga hegöi ira Farizaiʼo?”+ 15 Imane khöra Yesu, ”Sagötö fefao marafule+ ba zi fahuwu khönia, lö abu dödöra lö? Hizaʼi, na tehalö marafule moroi khöra,+ awena ba daʼö fuasö ira. 16 Na so mbaru satua si no asika, lö hadöi labeʼe balo-balonia nukha si bohou. Tekiko dania nukha si bohou andrö ba itugu ebua zasika.+ 17 Simanö göi nagu si bohou, lö laʼiröʼö ba naha* satua, tola manö aboto nahania ba aduwa nagu. Hizaʼi, laʼiröʼö nagu si bohou ba naha si bohou enaʼö lö tekiko.”
18 Me fahuo-huo Yesu, tohare samösa zamatörö ituhi danö föna Yesu imane, ”No mate nonogu alawe iadaʼa. Ae ba nomogu, tufa tangau ia, ba hasambalö ifuli auri.”+
19 Ba möi Yesu hegöi ira nifahaʼönia, laʼoʼö ia. 20 Furi Yesu, so samösa ndra alawe sendro talu+ sangahatöʼö yaʼia ba ibabaya gahe mbaru Yesu.+ No 12 fakhe göna khönia wökhö daʼö. 21 Ifalua daʼö börö me iwaʼö tödönia, ”He ha ubabaya mbarunia, ba döhö ndraʼo.” 22 Ibaliʼö ia Yesu wamaigi ira alawe andrö imane, ”Böi ataʼufi onogu! No ifadöhö ndraʼugö famatimö.”+ Iʼanemaiʼö döhö ndra alawe andrö.+
23 Me irugi nomo zamatörö andrö Yesu, iʼila zi fasurune awö niha sato, laduhugö wege-ege.+ 24 Iwaʼö khöra Yesu, ”Miʼae baero. Tenga si mate nono alawe andre, ha si mörö.”+ Ba laʼigi-igiʼö ia niha sato. 25 Me no mofanö baero niha sato, ba möi ia si bakha, igogohe danga+ nono alawe andrö ba maoso ia.+ 26 Tatu manö, terongo duria daʼa ba mbanua andrö maʼasagörö.
27 Lö ara, mofanö Yesu moroi ba daʼö. Ba dalu lala, so darua ndra matua sauʼa+ lagoʼö-goʼö ia moroi furi. Muʼao-ao ira lamane, ”Hakhösi tödö ndraʼaga, Maʼuwu Dawido.” 28 Aefa daʼö möi Yesu ba nomo, ba laʼondrasi ia niha sauʼa no mege. Isofu khöra Yesu, ”Hadia mamati ami wa tola ufadöhö ami?”+ Latema linia, ”Mamati ndraʼaga khöu Soʼaya.” 29 Aefa daʼö ibabaya höröra+ imane, ”Börö me mamati ami, ba yaʼitörö.” 30 Teboka höröra ba laʼila niha. Aefa daʼö, ifangelama ira Yesu, ”Böi so zangila hadia zalua andre.”+ 31 Hizaʼi, me mofanö ira, ladunö-dunö ba niha sanandrösa khö Yesu ba mbanua andrö maʼasagörö.
32 Me no mofanö ira, laʼohe khönia ndra matua si lö hede nifakao malaʼika si lö sökhi.+ 33 Me no mufofanö malaʼika si lö sökhi ba mboto niha si lö hede andrö, tola ifuli fahuhuo ia.+ Ahöli-höli dödö niha sato ba lamane, ”Lö irai alua zimane daʼa ba Gizaraʼeli.”+ 34 Ba lamane ira Farizaiʼo, ”Ifofanö malaʼika si lö sökhi börö wanolo moroi khö zalawa malaʼika si lö sökhi.”+
35 Itöröi fefu mbanua sebua awö mbanua side-ide Yesu, ifahaʼö niha ba nahia waʼowulo, ituriaigö duria somuso dödö sanandrösa ba Wamatörö Lowalangi, ba ifadöhö fefu ngawalö wökhö hegöi faʼatebai mboto.+ 36 Na ifaigi niha sato, ahakhö dödönia+ börö me tefakao ba tetiboʼö ira hulö mbiri-biri si lö kubalo.+ 37 Aefa daʼö, iwaʼö khö ndra nifahaʼönia, ”Ebolo mbasitö, hizaʼi lö ato zohalöwö.+ 38 Börö daʼö, miʼandrö khö Zokhö basitö enaʼö ato ifatenge zohalöwö.”+