Sangombakha

8 Haniha zimane niha satua-tua? Haniha zangila mangasiwai abula dödö?* Faʼatua-tua niha toʼele ba zikhalania, ba tobali fangohahau mbawania.

2 Umane, ”Oʼö wehede razo+ börö wahölusamö andrö khö Lowalangi.+ 3 Böi alio-liokö wofanö fönania.+ Böi oʼawögö zi lö sökhi.+ Tola manö ifalua zomasi ia, 4 börö me hasambalö mufalua niwaʼö razo andrö.+ Haniha zi tola mangumaʼö khönia, ’Hana wa öfalua daʼa?’”

5 Lö dania göna famaʼala niha samalua niwaʼö razo,+ ba tödö satua-tua iʼila ginötö hegöi lala* si tefaudu.+ 6 So ginötö hegöi lala* si tefaudu ba ngawalö hadia ia,+ börö me oya sibai gabula dödö niha. 7 Börö me lö hadöi sangila hadia dania zalua, haniha zi tola mangombakha hewisa waʼaluania?

8 Lö niha si tola mamatörö mazui manaha hanu-hanu waʼauri,* lö si tola motatugöi ngaluo waʼamate.+ Samösa lö latehegö molombase zi möi fasuwö, simane daʼö göi waʼalösökhi lö itehegö teʼefaʼö zamalua yaʼia.

9 No uʼila fefu daʼa ba uʼameʼegö tödö ngawalö halöwö nifalua ba gulidanö,* götö wa ibaliʼö ia niha samatörö awönia niha irege teʼala ia.+ 10 Uʼila göi niha si lö sökhi samangörö-ngörö yaʼira weʼamöi ba nahia niʼamoniʼö, hizaʼi no lakoʼo ira iadaʼa. Ba iʼanemaiʼö olifu niha mbanua daʼö waʼalösökhi nifaluara.+ Zaya-zaya gölö göi daʼa.

11 Börö me lö iʼanemaiʼö mufalua wanguhuku ba niha si lö sökhi,+ daʼö mbörö wa itugu abeʼe dödöra wamalua si lö sökhi.+ 12 Hewaʼae na mato otu kali ifalua zi lö sökhi niha sebua horö ba anau nosonia, hizaʼi aboto ba dödögu wa itema dania mbua si sökhi niha sangataʼufi Lowalangi sindruhu börö me laʼataʼufi ia.+ 13 Itema dania mbua si lö sökhi niha samalua si lö sökhi,+ lö iʼila iʼanauʼö nosonia si taya hulö lumö-lumö+ börö me lö iʼataʼufi Lowalangi.

14 Alua zi tobali zaya-zaya gölö* ba gulidanö: Si lö sökhi nifalua ba niha satulö,+ ba si sökhi nifalua ba niha si lö sökhi.+ Uwaʼö wa zaya-zaya gölö göi daʼa.

15 Moloʼö yaʼo, abölö sökhi waʼomuso dödö+ börö me sabölö sökhi ba niha gulidanö* yaʼia daʼö femanga ba famadu, ba laʼomusoiʼö dödöra. Daʼö zinangea irasoi ba zi no iʼeregesi tödö sandrohu faʼaurinia+ nibeʼe Lowalangi sindruhu khönia ba gulidanö.*

16 Uʼosambuaʼö dödögu ba wanöndra faʼatua-tua hegöi ba wamaigi ngawalö zalua* ba gulidanö,+ lö usöndra wemörö bongi maʼökhö.* 17 Aefa daʼö, unehegö fefu nifalua Lowalangi sindruhu, ba aboto ba dödögu wa lö ikhamö fangera-ngera niha zalua ba gulidanö,*+ gofu hewisa wamorege nifaluara. Hewaʼae na atua-tua ira ba aboto ba dödöra lawaʼö, hizaʼi tenga sindruhu-ndruhu aboto ba dödöra.+