Nisura Mareko
11 Me no ahatö larugi Yeruzalema, ofeta ira ba Mbetifage hegöi ba Mbetania+ ba Hili Zaitu. Aefa daʼö, ifatenge darua ndra nifahaʼönia Yesu,+ 2 iʼombakhaʼö khöra, ”Miʼaeʼe ba mbanua side-ide andrö föna, mirugi sibai ba miʼila sageu nono galide si no lafesu si lö irai lafonoro. Mitotoʼö wesunia ba miʼohe ba daʼa. 3 Na so zanofu, ’Hana wa mitotoʼö daʼö?’ mimane wangumaʼö, ’Moguna khö Zoʼaya, ba hasambalö ifuli ba waʼalio.’” 4 Mofanö ira ba laʼila nono galide andrö si no lafesu föna nomo ba zinga lala ba latotoʼö.+ 5 Niha si so ba daʼö lamane, ”Hana wa mitotoʼö wesu galide andrö?” 6 Latema lira simane si no iʼoroiʼö Yesu, ba latehegö khöra wolohe kalide.
7 Laʼohe nono galide+ andrö khö Yesu. Labeʼe ba hulu galide mbarura tanö baero ba modadao Yesu yawa.+ 8 Ato göi niha samologö ba lala barura tanö baero, ba tanö böʼö so zanaba daha geu moroi ba mbenua.+ 9 Aefa daʼö, lö aetu-aetu muʼao niha sato si so tanö föna hegöi tanö furi Yesu. Lamane, ”He Lowalangi, lumöʼö* ia!+ Yatefahowuʼö zi tohare ba döi Yehowa!*+ 10 Yatefahowuʼö Wamatörö si lö ara tö tohare, Famatörö namada Dawido!+ He Lowalangi si so ba zorugo, lumöʼö ia!” 11 Me irugi Yeruzalema Yesu, möi ia ba gosali ba ifaigi fefu zi so ba zi fasuinia. Hizaʼi, börö me no arakhagö bongi, möi ia ba Mbetania fao ndra sinengenia si 12.+
12 Mahemolunia me laröi Mbetania, irasoi waʼolofo Yesu.+ 13 Iʼila döla geu ara satabö bulu moroi ba zaröu, ba möi ia ifaigi na so mbua ara andrö. Hizaʼi, me irugi mbörö, ha bulu niʼilania, lö bua börö me tenga inötö wowua me luo daʼö. 14 Imane ba geu daʼö, ”Lö si manga buamö saʼae.”+ Larongo ira nifahaʼö wehedenia andrö.
15 Aefa daʼö numalö ira ba Yeruzalema. Möi ia ba gosali, ifofanö zamawa hegöi sowöli ba daʼö. Ifalaula meza zanukari kefe hegöi baku-baku zamawa marafadi.+ 16 Lö itehe gofu haniha zanörö osali andrö labaliʼö lala foto ba wolohe noro. 17 Ifahaʼö niha ba imane khöra, ”Tenga no so ba zura, ’Omogu lafotöi omo wangandrö ba niha fefu’?+ Hizaʼi mibaliʼö omo zorabu.”+ 18 Me larongo daʼö ira kafalo gere hegöi sangila amakhoita, ibörögö laʼalui lala ba wamunu yaʼia.+ Ataʼu ira khö Yesu, börö me ahöli-höli dödö niha sato ba wamahaʼönia.+
19 Me no irugi tanö owi, mofanö Yesu hegöi ira nifahaʼönia laröi mbanua daʼö. 20 Mahemolu sihulö wonginia me latörö lala daʼö, no aleu döla geu ara andrö irugi waʼa.+ 21 Itörö tödö Wetero geu daʼö. Imane khö Yesu, ”He Samahaʼö,* faigi atö! No aleu döla geu ara niʼelifimö andrö.”+ 22 Imane khöra Yesu, ”Miʼamati khö Lowalangi.” 23 Sindruhu niwaʼögu, haniha zangumaʼö ba hili andre, ’Fazawaʼö ba fazaumbaʼö ba nasi,’ na lö aombö dödönia ba mamati ia wa itörö niwaʼönia andrö, hasambalö alua.+ 24 Börö daʼö uʼombakhaʼö khömi, miʼamati wa no mitema fefu hadia niʼandrömi, ba hasambalö wa misöndra.+ 25 Na mosindro ami ba wangandrö, miʼefaʼö gofu hadia zala nifalua niha böʼö khömi, enaʼö iʼefaʼö göi zalami Amami si so ba zorugo.”+ 26* ——
27 Ifuli zui möi ira ba Yeruzalema. Me itörö Yesu gosali, laʼondrasi ia ira kafalo gere, sangila amakhoita hegöi ira sondröniaʼö, 28 lamane khönia, ”Hezo moroi khöu waʼabölö ba wamalua daʼa fefu? Haniha zameʼe khöu faʼabölö daʼö?”+ 29 Imane khöra Yesu, ”So göi sambua nisofugu khömi. Na mitema ligu ba ufatunö khömi hezo moroi usöndra waʼabölö ba wamalua daʼa fefu. 30 Famayagö idanö nifalua Yohane+ andrö, moroi ba zorugo mazui moroi ba niha? Mitema ligu.”+ 31 Ibörögö fangöngö-ngöngö ira, ”Na tawaʼö, ’Moroi ba zorugo,’ imane khöda dania, ’Ba hana wa lö faduhu dödömi khönia?’ 32 Hadia barani ita wangumaʼö, ’Moroi ba niha’?” Ataʼu ira ba niha sato börö me faduhu dödöra wa Yohane andrö sindruhu-ndruhu samaʼeleʼö.+ 33 Börö daʼö lamane khö Yesu, ”Lö maʼila.” Imane khöra Yesu, ”Lö göi ufatunö khömi hezo moroi usöndra waʼabölö ba wamalua daʼa fefu.”