2 Moze
38 Ba ifazökhi Bezaleʼeli naha wanunu sumange nitunu si öfa sagi moroi ba geu akasia. Mato dua meter waʼanau, mato dua meter waʼebolo, ba mato sameter waʼalawa.*+ 2 Aefa daʼö, ifazökhi dandru ba zi öfa watalinga naha wanunu sumange andrö. Lö ifaefa wamazökhi yaʼia, ba ifoʼuli faoma tembaga.+ 3 Ifazökhi fefu gama-gama soguna ba naha wanunu sumange, yaʼia daʼö embe, tambila, tambala, garafu hegöi naha mbo galitö. Fefu daʼö ifazökhi moroi ba tembaga. 4 Ifakhai göi mato hauga ngawua tembaga tobali simane saiwa ba ibeʼe ba narö naha wanunu sumange, tanö ba gotalua. 5 Ifazökhi göi öfa ngawua zi hulö galadanga ba zi öfa watalinga naha wanunu sumange, ahatö ba zi hulö zaiwa tembaga andrö. Bakha ba galadanga daʼö mubeʼe dania mbea-bea famazawa naha wanunu sumange. 6 Ifazökhi mbea-bea andrö moroi ba geu akasia ba ifoʼuli faoma tembaga. 7 Ibeʼe mbe-bea daʼö bakha ba zi hulö galadanga si so ba zinga naha wanunu sumange enaʼö tola mufazawa. Ifazökhi naha wanunu sumange andrö moroi ba wafa ba hulö kota-kota si öfa sagi si lö ösi.
8 Ifazökhi mbaʼa nidanö awö duwu-tuwunia moroi ba tembaga.+ Ba wamazökhi yaʼia, iʼogunaʼö zörömi* niʼokhögö ndra alawe si lö mamöhöli fohalöwö ba mbawandruhö nose waʼowulo.
9 Ifazökhi golayama ba nose Lowalangi.+ Ba golayama sangotahögö tanö raya, ibeʼe nukha mbaʼa-baʼa si tobali oto-oto nifazökhi moroi ba nukha si sökhi si no mundrandra, 44,5 meter* waʼanau.+ 10 Ba zingania, so 20 rozi toga ba 20 dane-dane nifotögi moroi ba tembaga. Tefazökhi dawi-tawi ba toga andrö ba fefu wamakhainia* moroi ba wirö. 11 Tanö yöu, so nukha mbaʼa-baʼa faʼanaunia 44,5 meter,* so göi 20 rozi toga ba 20 dane-dane nifotögi moroi ba tembaga. Fefu dawi-tawi ba toga andrö awö wamakhainia* tefazökhi moroi ba wirö. 12 Hizaʼi tanö ba gaekhula, mato 22 meter* waʼanau nukha mbaʼa-baʼania, ba fulu rozi toga ba fulu dane-dane nifotögi. Fefu dawi-tawi ba toga andrö awö wamakhainia* tefazökhi moroi ba wirö. 13 Olayama sangotahögö atumbukha luo, mato 22 meter* waʼebolo. 14 Tanö ba daʼa so mbawa göli golayama. Tanö ba gambölö mbawa göli, mufasa nukha mbaʼa-baʼa 6,7 meter,* ba so tölu rozi toga ba tölu dane-dane nifotögi. 15 Tanö ba gabera mbawa göli golayama daʼö, mufasa nukha mbaʼa-baʼa 6,7 meter* waʼanau, ba so tölu rozi toga ba tölu dane-dane nifotögi. 16 Fefu nukha mbaʼa-baʼa si tobali oto-oto ba zi fasui olayama, tefazökhi moroi ba nukha si sökhi si no mundrandra. 17 Fefu dane-dane nifotögi nibeʼe ba toga andrö tefazökhi moroi ba tembaga. Fefu dawi-tawi awö wamakhainia* tefazökhi moroi ba wirö. Mufoʼuli faoma firö dete toga andrö ba so wamakhainia* moroi ba wirö soguna ba toga golayama.+
18 Nukha mbaʼa-baʼa soguna ba mbawa göli golayamania musoso moroi ba nukha si sökhi si no mundrandra, bana sobalau, nukha si ungu laʼa-laʼa* hegöi bana soyo.* Faʼanaunia 8,9 meter,* faʼalawania mato 2 meter,* fagölö waʼalawania ba nukha mbaʼa-baʼa si tobali oto-oto golayama.+ 19 Toga si öfa rozi hegöi dane-danenia si öfa ngawua si no mufotögi tefazökhi moroi ba tembaga. Tawi-tawinia moroi ba wirö, ba mufoʼuli faoma firö dete awö wamakhainia.* 20 Fefu daru-taru nukha ba nose Lowalangi hegöi taru-taru ba nukha mbaʼa-baʼa si tobali oto-oto golayama, tefazökhi moroi ba tembaga.+
21 Daʼa fefu döi-töi gama-gama niʼogunaʼö ba wamazökhi ose Lowalangi, yaʼia daʼö ose si so Famaduhuʼö.+ No iwaʼö Moze ba niha Lewi+ enaʼö lasura fefu döi-töi gama-gama andrö. Itamari+ zondröniaʼö yaʼia, ono Gere Aʼaroni. 22 Fefu niʼoroisi Yehowa khö Moze, ifalua daʼö Besaleʼeli+ ono Guri ono Huri moroi ba mado Yehuda. 23 Falulu fohalöwö khönia Goholiabi+ ono Gahizamakhi moroi ba mado Dano. Oholiabi andre samösa tuka, ba onekhe ia wosuzi hegöi ba wanoso bana sobalau, nukha si ungu laʼa-laʼa,* bana soyo awö nukha si sökhi.
24 Faʼoya ganaʼa niʼogunaʼö ba wamazökhi fefu soguna ba naha niʼamoniʼö andrö fagölö waʼoyania ba ganaʼa nibaliʼö sumange nifazaule.+ Faʼabuania fefu 1 ton* moloʼö suʼa-suʼa waʼabua niʼogunaʼö ba nahia niʼamoniʼö. 25 Faʼoya wirö niʼohe niha si no tesura töi yaʼia daʼö 3,4 ton* moloʼö suʼa-suʼa waʼabua niʼogunaʼö ba nahia niʼamoniʼö. 26 Ero samösa nono matua si töra 20 fakhe si no tesura töi laʼohe önö gram* wirö+ moloʼö suʼa-suʼa waʼabua niʼogunaʼö ba nahia niʼamoniʼö. Faʼatora 603.550 niha.+
27 Faʼoya wirö niʼogunaʼö ba wamazökhi si 100 ngawua dane-dane nifotögi ba döla-döla nose Lowalangi* hegöi nukha mbaʼa-baʼa yaʼia daʼö 3,4 ton.* Ero sambua dane-dane nifotögi muʼogunaʼö 34,2 kilogram* wirö.+ 28 Faʼoya wirö niʼogunaʼö ba wamazökhi tawi-tawi yaʼia daʼö 20 kilogram,* ba laʼogunaʼö daʼö ba wamoʼuli dete toga. Aefa daʼö, ifatohu enaʼö hatö sambua.
29 So 2.421 kilogram* tembaga nibeʼe sumange.* 30 Iʼogunaʼö daʼö fefu ba wamazökhi dane-dane nifotögi soguna ba toga mbawandruhö nose waʼowulo, ba wamazökhi naha wanunu sumange tembaga hegöi saiwa tembaga, fefu gama-gama naha wanunu sumange, 31 dane-dane nifotögi soguna ba toga ba zi fasui olayama hegöi ba mbawa göli golayama, ba taru-taru+ soguna ba nukha nose Lowalangi awö nukha mbaʼa-baʼa si tobali oto-oto golayama.