Yesaya
2 Daʼa gangilata Yesaya ono Gamosi sanandrösa khö Yehuda hegöi Yeruzalema:+
Aro hili nahia nomo Yehowa
Ba tefasindro ia ba zuzu hili fondrege zalawa+
Teʼalawaʼö ia yawa hili-hili andrö maʼafefu;
Fefu niha moroi ba ngawalö soi möi ira ba daʼö.+
3 Ato niha si möi ba daʼö ba lamane,
”Aine, möi ita ba hili Yehowa,
Ba nomo Lowalangi Yakobo.+
Ifahaʼö ita lala andrö khönia,
Ba tatörö lala nibeʼenia.”+
4 Yaʼia zi tobali sanguhuku ba gotalua soi
Iʼasiwai gamadöniwa ba ngawalö soi.
Labaliʼö faku ziʼölira
Ba labaliʼö sabi dohora.+
Lö hadöi soi sanuyu föda ba wolawa soi böʼö,
Ba lö saʼae lafomaha ira fasuwö.+
5 He yaʼami ngaʼötö Yakobo, miʼaine,
Datatörö haga andrö khö Yehowa.+
6 No öröi nono mbanuau, yaʼia daʼö ngaʼötö Yakobo,+
Börö me no fahöna khöra ngawalö zi otarai ba Gatumbukha;
Laʼogunaʼö gelemu+ simane niha Wilisiti,
Ba ato ngaʼötö niha baero zi toröi ba gotaluara.
7 Afönu firö hegöi anaʼa mbanuara andrö,
Lö suʼa-suʼa gokhötara.
Afönu kudo mbanuara,
Tebai muʼerai hawaʼoya gureta wasuwöta niʼokhögöra.+
8 Afönu mbanuara lowalangi böʼö si lö moguna.+
Mangalulu ira ba gama-gama nifazökhi dangara,
Nifazökhi duturura samösa.
9 Latuhi danö ba teʼide-ideʼö ira,
Ba tebai uʼefaʼö zalara.
10 Ae ba narö gara ba khao danö ba waminiʼö yaʼugö
Börö wönu Yehowa sataʼu ita
Ba börö lakhöminia sebua.+
11 Teʼide-ideʼö niha si fayawa,
Ba mufaöndrö* dania niha sasiliyawa.
Ba luo daʼö, ha Yehowa niʼalawaʼö.
12 Daʼö ngaluo khö Yehowa samatörö saradadu zorugo.+
Göna dania niha si fayawa ba sasiliyawa,
Si tehöngö hegöi side-ide.+
13 Göna fefu geu eresi Libano salawa ba sebua
Hegöi eu sabölö ebua ba Mbazana,
14 Fefu hili sebua
Awö hili-hili salawa,
15 Fefu malige salawa, awö göli saro,
16 Fefu göfa Darisi+
Hegöi tundraha si baga-baga.
17 Teʼide-ideʼö niha si fayawa,
Ba mufaöndrö* dania niha sasiliyawa.
Ba luo daʼö, ha Yehowa niʼalawaʼö.
18 Tehori dania lowalangi si lö eluaha.+
19 Möi niha ba dögi narö gara,
Hegöi ba narö danö,+
Börö wönu Yehowa sataʼu ita
Ba lakhöminia fondrege zebua,+
Ba ginötö mozizio ia ba wamaheu ulidanö irege so khöra waʼataʼu.
20 Ba luo daʼö, lahalö nadu si lö moguna nifosumangera
Nifazökhira samösa moroi ba wirö hegöi anaʼa.
Latiboʼö daʼö, labeʼe ba deʼu hegöi ba mbögi.+
21 Aefa daʼö, möi ira ba gotalua gara,
Awö ba gotalua hili sokara,
Börö wönu Yehowa sataʼu ita
Ba börö lakhöminia fondrege zebua,
Ba ginötö mozizio ia ba wamaheu ulidanö irege so khöra waʼataʼu.
22 Enaʼö sökhi waʼaurimi, böi mifaduhusi tödö saʼae niha gulidanö,
Tebai auri ira na lö mohanu-hanu.
Hadia guna wa mifaduhusi tödö ira?