2 Moze
40 Imane Yehowa khö Moze, 2 ”Ba ngaluo si oföna ba mbaŵa siföföna, ba daʼö fasindro nose Lowalangi, yaʼia daʼö ose waʼowulo.+ 3 Beʼe bakha dawöla Famaduhuʼö+ ba beʼe nukha mbaʼa-baʼa+ tanö föna Dawöla andrö. 4 Ohe bakha meza+ ba haogö faʼanö gama-gama ba detenia, ohe naha wandru+ ba fohola.+ 5 Aefa daʼö, beʼe naha wanunu sumange somuhua+ moroi ba ganaʼa tanö föna dawöla Famaduhuʼö, ba beʼe nukha mbaʼa-baʼa ba mbawandruhö nose Lowalangi.+
6 ”Beʼe naha wanunu sumange nitunu+ andrö föna mbawandruhö nose Lowalangi, yaʼia daʼö ose waʼowulo. 7 Beʼe mbaʼa nidanö ba gotalua nose waʼowulo faoma naha wanunu sumange. Foʼösi mbaʼa daʼö faoma idanö.+ 8 Aefa daʼö, beʼe nukha mbaʼa-baʼa si tobali oto-oto ba zi fasui golayamania,+ ba beʼe göi nukha mbaʼa-baʼa+ ba mbawa göli golayamania. 9 Halö wanikha famataro,*+ tefeʼö ba* nose Lowalangi awö nösinia maʼafefu.+ Amoniʼö daʼö fefu hegöi gama-gamania enaʼö tobali niʼamoniʼö. 10 Tefeʼö göi wanikha daʼö ba naha wanunu sumange nitunu awö gama-gamania. Amoniʼö daʼö fefu enaʼö tobali fondrege niʼamoniʼö.+ 11 Tefeʼö nasa wanikha daʼö ba mbaʼa nidanö hegöi ba duwu-tuwunia ba amoniʼö.
12 ”Kaoni Gaʼaroni hegöi iraononia matua ba mbawandruhö nose waʼowulo, ba waʼö enaʼö lasasai ira ba nidanö.+ 13 Fonukha Gaʼaroni faoma baru niʼamoniʼö,+ bayoini ia+ ba amoniʼö enaʼö tobali ia ere sangai halöwö khögu. 14 Aefa daʼö, kaoni ndraononia matua enaʼö lafahatö ira ba fonukha ira faoma nukha sebua.+ 15 Bayoini ira göi simane amara+ enaʼö tobali ira ere sangai halöwö khögu. Na no tebayoini ira, tobali ira ere sangai halöwö khögu götö-götö waʼara, he yaʼira hegöi ngaʼötöra.”+
16 Iʼoʼö fefu daʼö Moze. Ifalua simane sibai niwaʼö Yehowa khönia.+
17 Ba ngaluo si oföna ba mbaŵa siföföna, ba ndröfi si mendrua tefasindro nose Lowalangi.+ 18 Me ifasindro nose Lowalangi andrö Moze, ibeʼe dane-dane nifotögi,+ döla-dölania,+ baʼa-baʼania,+ awö toga-togania. 19 Ibologö yawa nukha lagö-lagö+ ba nose Lowalangi, ibeʼe lagö-lagö tanö baero+ simane niwaʼö Yehowa khönia.
20 Aefa daʼö, ihalö Wamaduhuʼö+ ba ifedadao bakha ba Dawöla.+ Ibeʼe mbea-bea+ ba Dawöla+ andrö hegöi lagö-lagönia.+ 21 Iʼohe Dawöla daʼö Moze bakha ba nose Lowalangi, ba ibeʼe nukha mbaʼa-baʼa+ ba wombalugö tawöla Famaduhuʼö+ andrö simane niwaʼö Yehowa khönia.
22 Baero daʼö, ibeʼe meza+ bakha ba nose waʼowulo, yaʼia daʼö tanö baero nukha mbaʼa-baʼa, tanö yöu nose waʼowulo. 23 Ifalaete roti+ ba dete meza föna Yehowa simane niwaʼö Yehowa khönia.
24 Ibeʼe naha wandru+ bakha ba nose waʼowulo, yaʼia daʼö föna meza, tanö raya nose Lowalangi. 25 Ifohola fefu wandru+ daʼö föna Yehowa, simane niwaʼö Yehowa khönia.
26 Ba ibeʼe naha wanunu sumange+ moroi ba ganaʼa bakha ba nose waʼowulo, föna nukha mbaʼa-baʼa. 27 Moguna naha wanunu sumange andrö ba wanunu sumange somuhua+ enaʼö numalö miyawa zimbo,+ simane niwaʼö Yehowa khönia.
28 Aefa daʼö, ibeʼe nukha mbaʼa-baʼa+ ba mbawandruhö nose Lowalangi.
29 Ibeʼe naha wanunu sumange nitunu+ Moze föna mbawandruhö nose Lowalangi, yaʼia daʼö ose waʼowulo, enaʼö tola labeʼe zumange nitunu+ ba sumange niʼa* ba detenia, simane niwaʼö Yehowa khönia.
30 Me no awai daʼö, ibeʼe mbaʼa nidanö ba gotalua nose waʼowulo faoma naha wanunu sumange. Ifoʼösi mbaʼa daʼö faoma idanö.+ 31 Ba daʼö lasasai dangara awö gahera ira Moze, Aʼaroni hegöi iraononia matua. 32 Ero möi dania ira ba nose waʼowulo mazui lafahatö ira ba naha wanunu sumange, lasasai ira ba daʼö+ simane niwaʼö Yehowa khö Moze.
33 Ba gafuriata, ifasa nukha mbaʼa-baʼa si tobali oto-oto golayama+ ba zi fasui ose Lowalangi hegöi naha wanunu sumange. Ifasa göi nukha ba mbawa göli golayamania.+
Ba awai ifalua fefu daʼö Moze. 34 Lö ara, ibörögö so lawuo sangahawui ose waʼowulo, ba afönu lakhömi Yehowa nose Lowalangi andrö.+ 35 Tebai möi Moze bakha ba nose waʼowulo börö me no ihawui lawuo ba afönu lakhömi Yehowa nose Lowalangi.+
36 Na tefazawa lawuo daʼö moroi ba nose Lowalangi, lafawuʼa nosera iraono Gizaraʼeli ba nahia tanö böʼö. Lö laböhöli wamalua daʼö sagötö feʼasora ba danö si mate.+ 37 Hizaʼi, na lö tefazawa lawuo daʼö, ba lö lafawuʼa nosera.+ 38 Sagötö fofanöra ba danö si mate, laʼila iraono Gizaraʼeli wa so lawuo moroi khö Yehowa yawa ba nose Lowalangi andrö ba zi maʼökhö, ba so galitö ba zi bongi.+