Yesaya
58 ”Horigö waʼabölöu weʼao; böi taha!
Ebuaʼö liu simane li dorofe nifazökhi moroi ba dandru,
Ombakhaʼö ba nono mbanuagu sanandrösa ba wamadaöra;+
Ba ombakhaʼö ba ngaʼötö Yakobo horö si no lafalua.
2 Ero maʼökhö laʼalui ndraʼo,
Ba laʼoromaʼö wa omasi ira laʼila lala andrö khögu,
Hulö soi samalua sindruhu ira
Laʼandrö khögu ba wanguhuku yaʼira si fao faʼatulö;
Ba omasi ira ahatö khö Lowalangi.+
3 Manofu ira iadaʼa, ’Hana wa lö öfaigi ndraʼaga me mafalua wuasö?+
Hana wa lö ba dödöu me maforomaʼö wangide-ngideʼö?’+
4 Ba waʼudusa hegöi ba wasosota aekhu wozu wuasömi,
Ba mitezu niha si fao faʼalösökhi.
Tebai mifalua wuasö simane nifaluami iadaʼa, böi midöna-döna wa tefondrondrongo gangandröwami ba zorugo.
5 Hadia simane daʼa wuasö niʼandrögu khömi:
Ba ginötö iʼide-ideʼö ia si samösa niha,
Ba ikaöndrö ia simane duʼu salawa,
Ba wamazökhi nukha goni hegöi awu si tobali naha wemörönia?
Hadia daʼö nifotöimi fuasö hegöi ngaluo si möi fangomusoiʼö dödö Yehowa?
6 Tenga fuasö simane daʼö niʼandrögu, hizaʼi daʼa:
Ba wangeheta rate waʼalösökhi,
Ba wangeheta böbö geu kalo mbagi,+
Ba wangefaʼö niha nifakao,+
Hegöi ba wamatö talu geu si tobali kalo mbagi;
7 Daʼö ginötö ba wombagi öu roti ba niha solofo,+
Ba wolohe ba nomomö niha si numana hegöi niha si lö omo,
Ba wameʼe nukha ba niha si lö nukha,+
Ba lö öʼerogö dalifusöu.
8 Na öfalua daʼö, mohaga dania ndraʼugö simane na tumbu haga luo,+
Ba lö ara tö döhö ndraʼugö.
So dania ba duduma höröu zindruhu,
Ba ilumöʼö ndraʼugö lakhömi Yehowa andrö moroi furi.+
9 Ba ginötö muʼao ndraʼugö, yaʼo Yehowa, utema liu;
Na öʼangaröfili ndraʼo, ba umane, ’Yaʼe ndraʼo!’
Na öheta kalo mbagi wamakao ba gotaluami
Ba öbato wanuturu niha böʼö ba lö öwaʼö wehede si lö sökhi,+
10 Na öbeʼe ba niha solofo zomasi-masi dödöu+
Ba öbönökhi zoguna ba niha si göna famakao,
Humaga haga andrö khöu ba dalu zogömi-gömi,
Ba tobali haga ba zi laluo waʼogömi-gömi andrö khöu.+
11 Lö ibato Yehowa ba wameʼe khöu fanuturu lala
Ba iʼabusoiʼö ndraʼugö hewaʼae ba danö si mate soʼö;+
Iʼabeʼeʼö dölamö,
Ba tobali ndraʼugö simane kabu si no muhaogö muhawui faoma idanö,+
Simane umbu nidanö si lö irai oköli.
12 Börö ndraʼugö wa mufuli muhaogö mbanua si no ara tedudugö;+
Öfuli öhaogö wondrasi si no muröi iʼotarai mböröta.+
Ba lafotöi ndraʼugö niha samazökhi öli si no adudu,*+
Niha sangehaogö lala ba nahia niʼiagö niha dania.
13 Na börö Zabato wa öböhöli wangalui hare,* ba ngaluo niʼamoniʼö khögu,+
Ba öfotöi ngaluo Sabato andrö ngaluo si sökhi sibai, ngaluo niʼamoniʼö khö Yehowa, ngaluo nifolakhömi,+
Ba na abölö tohude ia ba wamaigimö moroi ba wolohi hare hegöi fehede niha si lö karua,
14 Hasambalö wa ösöndra waʼomuso dödö börö ndraʼo, iwaʼö Yehowa.
Ubaliʼö ndraʼugö samatörö ba nahia sagalawa ba gulidanö.+
Ubeʼe khöu gondröita duamö Yakobo, enaʼö ösöndra göu ba daʼö,+
Börö me Yehowa zangumaʼö.”