1 Moze
1 Ba mböröta, ifazökhi Lowalangi mbanua si yawa awö danö.+
2 Lö hadöi nasa hadia ia ba gulidanö ba lö ösi. Ha faʼogömi-gömi zi so, daʼö zombalugö idanö sabakha*+ ba manaha-nahae misa waʼabölö+ Lowalangi* ba dete nidanö.+
3 Ba imane Lowalangi, ”Yamohaga.” Ba alua haga.+ 4 Me no aefa daʼö, iʼila Lowalangi wa si sökhi haga andrö. Ibörögö wamabali haga ba zogömi-gömi Lowalangi. 5 Ifotöi haga andrö Lowalangi si Maʼökhö, ba sogömi-gömi andrö si Bongi.+ Alua zi maʼökhö ba alua zi bongi, daʼö ngaluo siföföna.
6 Aefa daʼö imane Lowalangi, ”Yaso gotalua sebolo+ ba gotalua nidanö, samabali idanö+ tobali dua ngawawa.” 7 Aefa daʼö, ifazökhi gotalua sebolo+ Lowalangi samabali idanö si so ba narö gotalua andrö moroi ba nidanö si so yawania. Ba alua daʼö. 8 Ifotöi gotalua sebolo andrö Lowalangi Banua. Alua zi maʼökhö ba alua zi bongi, daʼö ngaluo si dua.
9 Ba imane Lowalangi, ”Yaʼowulo nidanö si so ba narö mbanua ba zi sambua nahia; ba yaʼalua+ danö sabeʼe.” Ba alua daʼö. 10 Ifotöi danö sabeʼe andrö Lowalangi Tete Danö,+ ba idanö sowulo andrö Asi.+ Iʼila Lowalangi wa si sökhi daʼö fefu.+ 11 Imane Lowalangi, ”Yatumbu ndruʼu ba danö, simanö göi ngawalö zinanö sohunö ba eu sowua ba sohunö.” Ba alua daʼö. 12 Ba tumbu ngawalö ndruʼu ba danö, sinanö+ sohunö ba eu sowua ba sohunö. Iʼila Lowalangi wa si sökhi daʼö fefu. 13 Alua zi maʼökhö ba alua zi bongi, daʼö ngaluo si tölu.
14 Ba imane Lowalangi, ”Yaso zi haga+ ba dalu mbanua ba wamöföʼö si maʼökhö ba si bongi.+ Daʼö dandra ba wangoromaʼö baŵa, ngaluo awö ndröfi.+ 15 Daʼö fefu zi tobali haga ba dalu mbanua, ba wohagaini ulidanö.” Ba alua daʼö. 16 Aefa daʼö, ifazökhi dombua zi haga Lowalangi. Haga sabölö ebua sohaga* ba zi maʼökhö,+ ba sabölö ide-ide sohaga* ba zi bongi. Ifazökhi göi ngawalö ndröfi Lowalangi.+ 17 Ifataro ira fefu Lowalangi ba dalu mbanua ba wohagaini ulidanö, 18 ba wohagaini* si maʼökhö ba si bongi hegöi ba wamöföʼö si haga ba sogömi-gömi.+ Iʼila Lowalangi wa si sökhi daʼö fefu. 19 Alua zi maʼökhö ba alua zi bongi, daʼö ngaluo si öfa.
20 Ba imane Lowalangi, ”Yaso gurifö* sauri ba nidanö, ba yaso gurifö si hombo ba dalu mbanua.”+ 21 Ba ifazökhi Lowalangi ngawalö giʼa segebua sauri ba nasi, urifö* sauri ba nidanö awö ngawalö gurifö si hombo. Iʼila Lowalangi wa si sökhi daʼö fefu. 22 Ifahowuʼö ira Lowalangi imane, ”Miʼoʼono ba miʼoyaʼö ami ba mifoʼösi nasi.+ Ba yamonönö waʼoya gurifö si hombo göi ba gulidanö.” 23 Alua zi maʼökhö ba alua zi bongi, daʼö ngaluo si lima.
24 Ba imane Lowalangi, ”Yaso ngawalö gurifö* ba gulidanö, yaʼia daʼö ngawalö gurifö nifaliaro, utu ndruʼu, ba urifö tanö böʼö.”*+ Ba alua daʼö. 25 Aefa daʼö, ifazökhi Lowalangi ngawalö gutu ndruʼu, ngawalö gurifö nifaliaro, awö ngawalö gurifö tanö böʼö.* Iʼila Lowalangi wa si sökhi daʼö fefu.
26 Ba imane Lowalangi, ”Datafazökhi+ niha famaedoda,+ si fakhili-khili khöda.+ Yaʼira dania zamatörö iʼa ba nasi, urifö si hombo ba dalu mbanua, urifö nifaliaro awö ngawalö gurifö tanö böʼö* ba gulidanö. Enaʼö yaʼira zamatörö ulidanö maʼasagörö.”+ 27 Ba ifazökhi niha Lowalangi famaedonia. Ifazökhi ndra matua hegöi ira alawe famaedonia.+ 28 Aefa daʼö, ifahowuʼö ira Lowalangi ba imane khöra, ”Miʼoʼono ba miʼoyaʼö ami, mifoʼösi gulidanö+ ba mifatörö ia.+ Mifatörö+ giʼa ba nasi, urifö si hombo awö gurifö sauri ba dete danö.”
29 Ba imane Lowalangi, ”Ubeʼe khömi fefu zinanö sohunö ba zi sagörö ulidanö awö ngawalö geu sowua ba sohunö. Daʼö gömi.+ 30 Ba ubeʼe fefu ngawalö mbulu ndruʼu tobali balazo gutu ndruʼu, ngawalö gurifö si hombo, ba fefu gurifö* sauri saliwa-liwa ba danö.”+ Ba alua daʼö.
31 Aefa daʼö, iʼila Lowalangi wa sökhi sibai fefu ngawalö nifazökhinia.+ Alua zi maʼökhö ba alua zi bongi, daʼö ngaluo si önö.