Halöwö Zinenge
15 So niha si tohare moroi ba Yudea ba labörögö wamahaʼö ira talifusö, ”Na lö lasuna ami moloʼö Oroisa Moze,+ lö teʼorifi ami.” 2 Hizaʼi, fabuʼa-buʼa ira khö Waulo ba khö Mbaranaba irege alua watötöisa ba gotaluara. Lahalö gangetula ira talifusö ba wamatenge Faulo, Baranaba, hegöi ira talifusö tanö böʼö khö ndra sinenge ba satua sokubaloi ba Yeruzalema+ ba wanofu amadöniwa daʼa.
3 Me no lafasao ira banua niha Keriso irugi dalu lala, latohugö wofanö, latörö Wenisia ba Samaria. Ba daʼö, lazara-zara wanutunö hewisa me ibörögö lafosumange Lowalangi niha moroi ba soi böʼö. Me larongo daʼö, omuso dödö ndra talifusö. 4 Me larugi Yeruzalema, latemaʼö ira banua niha Keriso, ira sinenge, hegöi ira satua sokubaloi. Ladunö-dunö hewisa me iʼogunaʼö ira Lowalangi ba wamalua hadia ia. 5 Hizaʼi, so ösa moroi ba agama Warizaiʼo zi no faduhu tödö, mozizio ira ba lamane, ”Moguna lasuna ira ba laʼoʼö Goroisa Moze.”+
6 Börö daʼö, owulo ndra sinenge hegöi satua sokubaloi ba wamatunö amadöniwa andre. 7 Börö me oya laʼogunaʼö ginötö ba wamatunö amadöniwa andrö ba lö aetu fabuʼa-buʼa ira, mozizio Wetero imane, ”He yaʼami ira talifusö, no miʼila iʼotarai mböröta wa no ifili ndraʼo Lowalangi ba gotaluada, enaʼö larongo soi böʼö daromali sanandrösa ba duria somuso dödö ba faduhu dödöra.+ 8 Ba no ifaduhuʼö ira Lowalangi sangila tödö niha,+ me ibeʼe khöra geheha niʼamoniʼö+ simane nibeʼenia khöda. 9 Maʼifu lö ifaehusi ita khöra.+ Hizaʼi, ihaogö dödöra börö me mamati ira.+ 10 Tobali, hana wa mitandraigö Lowalangi me mibeʼe noro sabua+ khö ndra nifahaʼö, si tebai laʼonoro ira tuada hegöi yaʼita samösa?+ 11 Sindruhunia, mamati ita simane yaʼira+ wa hasambalö teʼorifi ita börö waʼasökhi dödö sebua* moroi khö Zoʼaya Yesu.”+
12 Lö hede-hedera me larongo daʼö, ba ibörögö lafondrondrongo Mbaranaba hegöi Faulo sanutunö hewisa me iʼogunaʼö ira Lowalangi ba wamalua ngawalö dandra awö zahöli-höli dödö ba gotalua soi böʼö. 13 Me no aefa fahuhuo ira, imane Yakobo, ”Yaʼami ira talifusö, mifondrondrongo niwaʼögu. 14 No ahori itutunö Simeoni+ hewisa ba wamobörö me ifaigi soi böʼö Lowalangi, ba ituyu ba gotaluara zi tobali ono mbanuania ba döinia andrö.+ 15 Tefaudu daʼa ba Nisura Ndra Samaʼeleʼö, yaʼia daʼö, 16 ’Mangawuli ndraʼo wamazökhi ose* Dawido si no adudu; ufuli uʼazökhi gadudulania ba ufasindro simane me mböröta, 17 enaʼö laʼalui Yehowa* soroi ba dödö yaʼira si toröi andrö si fao ba ngawalö soi, ono mbanua nituyu ba döigu andrö, iwaʼö Yehowa,* samalua daʼa fefu,+ 18 si no utatugöi iʼotarai me mböröta.’+ 19 Börö daʼö uhalö gangetula, tenga ba wamusi tödö niha moroi ba soi böʼö somasi mamosumange Lowalangi,+ 20 hizaʼi ba wanura khöra enaʼö laʼaröuʼö ira moroi ba ngawalö nitaʼunöisi nadu,+ amuata wohorö,*+ urifö nitögi bagi,* hegöi do.+ 21 Iʼotarai me mböröta, so zanuriaigö misa ba mbanua sanandrösa khö Moze, börö me labaso nisurania ba nahia waʼowulo* ero luo sabato.”+
22 Aefa daʼö, lahalö gangetula ira sinenge, ira satua sokubaloi hegöi banua niha Keriso ba wamatenge ira talifusö si no mufili moroi ba gotaluara weʼamöi ba Gandriokhia, fao ira khö Waulo ba khö Mbaranaba. Lafatenge Yuda nifotöi Mbarasaba hegöi Sila,+ yaʼia daʼö sondröniaʼö ira talifusö. 23 Lasura zura daʼa ba lafaʼoheʼö khöra,
”Moroi khö ndra sinenge hegöi ira satua sokubaloi, ira talifusömi, khö ndra talifusö si so ba Gandriokhia,+ Siria, Kilikia moroi ba soi böʼö: Yaʼahowu! 24 Me no marongo wa so ösa ba gotaluama zi möi khömi ba lafaʼema ngawalö wehede si möi fangabu dödö,+ enaʼö fawuka gera-erami, hewaʼae lö niwaʼöma khöra, 25 no hasara dödöma wangai angetula ba wamatenge khömi ira talifusöda si darua sotöi Baranaba ba Faulo niha niʼomasiʼöma, 26 no lalulu waʼaurira* börö döi Zoʼaya yaʼita Yesu Keriso.+ 27 Börö daʼö, mafatenge göi Yuda ba Sila enaʼö lafaʼema daʼa khömi.+ 28 Eheha niʼamoniʼö+ ba yaʼaga göi, lö mafonoro ami, baero zi lö tola löʼö andre: 29 Miʼaröuʼö ami moroi ba ngawalö zumange nibeʼe ba nadu,+ moroi ba ndro,+ moroi ba gurifö nitögi bagi,*+ hegöi amuata wohorö.*+ Na miʼaröuʼö ami ba daʼö, ohahau dödömi. Yaʼahowu ami!”
30 Lafatenge ndra talifusö andrö weʼamöi ba Gandriokhia ba laʼowuloi ndra nifahaʼö ba daʼö ba wameʼe khöra sura. 31 Me no labaso, omuso dödöra ba teʼaroʼö wamatira. 32 Ba oya huhuo Yuda hegöi Sila si möi fondrara dödö ba fangaro ndra talifusö, me samaʼeleʼö göi ira.+ 33 Me no oya laʼogunaʼö ginötö wefao khöra ba daʼö, mangawuli ira ba Yeruzalema ba latötöna ira talifusö enaʼö lö hadia ia khöra ba lala. 34* —— 35 Hizaʼi, toröi Waulo faoma Baranaba ba Gandriokhia, fao ira ndra talifusö tanö böʼö, lafahaʼö ba laturiaigö duria somuso dödö sanandrösa ba daromali Yehowa.*
36 Ara maʼifu, imane Faulo khö Mbaranaba, ”Datafuli tafalukhaisi ndra talifusöda ero sambu-sambua banua ba zi no taturiaigö taromali Yehowa,* ba wamaigi hewisa ira.”+ 37 Omasi sibai Mbaranaba enaʼö fao khöra Yohane nifotöi Mareko,+ 38 hizaʼi lö omasi Waulo na fao khöra Mareko, börö me no iröi ira ba Wambilia ba lö falulu fohalöwö ia khöra.+ 39 Lua-luania, abölö-bölö watötöisa ba gotaluara irege fabali ira. Baranaba+ iʼohe Mareko, moloyo ira ba Zifirusi, 40 Faulo iʼohe Zila, ba mofanö ira me no lafaduhusi tödö ia khö Yehowa,*+ sebua faʼasökhi dödö.* 41 Mofanö ia ba Ziria hegöi ba Gilikia, iʼaroʼö mbanua niha Keriso ba daʼö.