Dua Ngaʼötö

11 Me ofeta Rehabeamo ba Yeruzalema, iʼanemaiʼö iʼowuloi fefu ngaʼötö Yehuda hegöi Beniami+ yaʼia daʼö 180.000 zaradadu si no toʼölö fasuwö,* möi ira wolawa iraono Gizaraʼeli enaʼö mangawuli wamatörö andrö khö Rehabeamo.+ 2 Aefa daʼö, ifaʼema Yehowa daromalinia khö Zemaya,+ enoni Lowalangi sindruhu imane, 3 ”Fatunö khö Rehabeamo andrö ono Zelomo razo Yehuda hegöi ba ndraono Gizaraʼeli fefu si so ba Yehuda awö Mbeniami, 4 ’Imane Yehowa, ”Böi misuwö dalifusömi. Miʼangawuli ba nomomi zamösana börö me yaʼo zamalua daʼa fefu.”’”+ Laʼoʼö niwaʼö Yehowa ba mangawuli ira. Lö lasuwö Yerobeamo.

5 Ba Yeruzalema toröi Yerobeamo ba ifazökhi mbanua nifoʼöli ba Yehuda. 6 Iʼaroʼö* Mbetilekhema,+ Etama, Tekoa,+ 7 Beti-suri, Sokho,+ Adula,+ 8 Gata,+ Maresa, Sifi,+ 9 Adoraʼi, Lakhisi,+ Aseka,+ 10 Sorea, Ayalona,+ ba Heberona,+ banua nifoʼöli ba Yehuda hegöi ba Mbeniami. 11 Aefa daʼö, iʼaroʼö nahia nifoʼöli. Ifataro ba daʼö ndra kumandru ba ibeʼe göra, fanikha, hegöi agu. 12 Ihenaigö mbaluse segebua awö doho ba mbanua sebua misa, ba tobali banua saro mbanua daʼö. Lö tebulö tobali tana khönia Yehuda faoma Beniami.

13 Faʼawö khönia ndra ere hegöi niha Lewi si so ba zi sagörö tanö Gizaraʼeli ba tohare ira fefu moroi ba mbanuara. 14 Laröi mbenuara soduʼu ira niha Lewi hegöi tanöra,+ ba möi ira ba Yehuda hegöi ba Yeruzalema, börö me no iʼefasi ira Yerobeamo awö ndraononia ba halöwöra tobali ere khö Yehowa.+ 15 Aefa daʼö, ifataro ndra ere khönia Yerobeamo ba nahia sagalawa,+ ba wamosumange lowalangi adu si hulö nambi*+ hegöi adu famaedo nono zawi nifazökhinia.+ 16 Fefu niha moroi ba mado Gizaraʼeli sangalui Yehowa Lowalangi ndraono Gizaraʼeli soroi ba dödö, laʼoʼö ira numalö ba Yeruzalema ba wameʼe sumange nitunu khö Yehowa, Lowalangi ndra tuara.+ 17 Tölu fakhe waʼara, laʼaroʼö wamatörö Yehuda ba falulu fohalöwö ira khö Rehabeamo ono Zelomo, börö me laʼoʼö lala Dawido hegöi Selomo sagötö zi tölu fakhe.

18 Mangowalu Rehabeamo khö Mahalata ono Yerimoto ono Dawido. Abihailo ninania ono Geliabi+ ono Gizaʼi. 19 Moʼono Mahalata, tumbu khönia nono matua, yaʼia daʼö Yehusi, Semaria, ba Sahama. 20 Lö ara, ifuli mangowalu Rehabeamo khö Maʼakha maʼuwu Gabisalomi.+ Tumbu khönia nono yaʼia daʼö Abia,+ Ataʼi, Sisa ba Selomiti. 21 So 18 woʼomonia ba 60 woʼomonia ba döi,+ 28 nononia matua ba 60 nononia alawe. Abölö iʼomasiʼö woʼomonia Maʼakha maʼuwu Gabisalomi moroi khö woʼomonia tanö böʼö hegöi foʼomonia ba döi. 22 Börö daʼö, ifataro Gabia ono Maʼakha andrö Rehabeamo tobali kafalo ba sondröniaʼö ira talifusönia, börö me omasi ia na daʼö zi tobali razo. 23 Hizaʼi iʼonekhesi ia Rehabeamo yaʼia me ifatenge* ösa ndraononia matua ba zi sagörö tanö Yehuda hegöi Beniami, ba mbanua nifoʼöli fefu,+ ba no ihöna wameʼe soguna khöra ba ato woʼomora.