Sangombakha
12 Törö-törö tödöu Zomböi yaʼugö Sebua Lakhömi fatua awuyu na ndraʼugö,+ fatua lö irugi inötö wamakao andrö+ mazui döfi niwaʼöu dania, ”Lö ohahau dödögu ba waʼaurigu”; 2 Fatua lö alö haga luo, baŵa hegöi döfi,+ ba mangawuli lawuo me no ilau* teu sabölö-bölö; 3 na manizi-nizi zanaro omo, na agaöndrö ndra matua sagabölö, na laböhöli ira alawe wogili börö me lö atoto tö saʼae ira,* na hatö faʼogömi-gömi niʼila ndra alawe* ba ginötö ifaigi moroi ba zandrela;+ 4 na ahori teduhö mbawandruhö saekhu ba lala sebua, na alö waʼebua li wogili, na maoso niha börö li wofo, na arakhagö lö terongo li nono alawe ba wanunö.+ 5 Aefa daʼö, ataʼu ira zagalawa ba humokha mbura ba lala, mobowo döla geu almond,*+ isöbi ia tamo, ba taya waʼami gö,* börö me lagamö-gamö niha nomo nisawara sagötö faʼara,+ ba mangörö-ngörö niha sabu tödö ba lala;+ 6 fatua lö aetu zinali firö, aboto mako anaʼa, arasa rumbi naha nidanö, ba adudu gaolo-gaolo wondröni timba ba mbaʼa nidanö. 7 Aefa daʼö, mangawuli gawu-gawu ba danö+ si tobali börötania, ba mangawuli nosonia khö Lowalangi sindruhu sameʼe yaʼia mege.+
8 ”Zaya-zaya gölö!” iwaʼö sangowuloi andrö.+ ”Oi zaya-zaya gölö fefu daʼö.”+
9 Baero wangokhögö faʼatua-tua, sangowuloi andrö lö iböhöli wamahaʼö niha ba ngawalö niʼilania.+ Iʼangeragö göi ba ihaogö wamareso enaʼö oya iʼowuloi* gamaedola.+ 10 Sangowuloi andrö iforege wangalui fehede si sökhi+ ba isura ngawua wehede sindruhu si tefaudu.
11 Hulö ziʼo gubalo wehede niha satua-tua andrö+ ba angowuloa wehedera amaedola gosö-osö si no tetaru ba lö togeha. Fefu daʼö moroi ba zi samösa kubalo. 12 He onogu, sanandrösa ba danö böʼö, fondrondrongo wamangelama andre: Lö iʼila awai wanura buku, ba marase mboto na talafo oya tafahaʼö ita khönia.+
13 Rahu-rahu moroi ba zi no muwaʼö andre fefu yaʼia daʼö: Ataʼufi Lowalangi sindruhu+ ba falua goroisania,+ börö me daʼa zinangea lafalua niha fefu.+ 14 Lowalangi sindruhu zanguhuku fefu hadia nifalua, simanö göi zi tobini, he si sökhi mazui si lö sökhi.+