Halöwö Zinenge
6 Samuza maʼökhö, me monönö waʼato nifahaʼö, ibörögö mukökö niha Yahudi sangogunaʼö li Yunani khö ndra niha Yahudi sangogunaʼö li Heberaiʼo, börö me laʼositengagö lakha mbanuara ba wombagi gö sero maʼökhö.+ 2 Börö daʼö, laʼowuloi fefu ndra nifahaʼö ira sinenge si 12 ba lamane, ”Lö sökhi* na maböhöli wamahaʼö taromali Lowalangi ha börö wombagi gö.+ 3 Börö daʼö, yaʼami ira talifusö, mifili dafitu ndra talifusö si sökhi turia,+ si no fahöna eheha niʼamoniʼö hegöi faʼatua-tua+ ba mafataro ira ba halöwö andre.+ 4 Na yaʼaga, maʼosambalöʼö dödöma ba wangandrö hegöi ba wamahaʼö taromali.” 5 Fao dödö ndra nifahaʼö fefu ba wehede daʼö, ba lafili Zitefano yaʼia daʼö niha samati ba safönu eheha niʼamoniʼö, simanö göi Wilifo,+ Ferokhoro, Nikanoro, Timo, Faremena, ba Nikolao, niha Gandriokhia si no faböbö ba agama Yahudi.* 6 Laʼohe ira khö ndra sinenge, ba latufa högöra ira sinenge me no aefa mangandrö.+
7 Lua-luania, itugu ato zamondrongo taromali Lowalangi,+ ba tedou-dou manö waʼato nifahaʼö+ ba Yeruzalema. Aefa daʼö, ibörögö ato ndra ere si faduhu tödö.+
8 Sitefano si no fahöna faʼahakhö dödö Lowalangi ba faʼabölö, oya ifalua zahöli-höli dödö hegöi tandra ba gotalua niha sato. 9 Hizaʼi, so ösa niha Yahudi nifotöi Sinagoga Niha Niʼefaʼö, si fao ba niha Girene hegöi Alesandria, simanö göi niha moroi ba Gilikia ba Asia, möi ira fabuʼa-buʼa khö Zitefano. 10 Hewaʼae simanö, tebai lalawa ia börö waʼatua-tuania fahuhuo ba börö wanuturu lala moroi ba geheha niʼamoniʼö.+ 11 Aefa daʼö, lalau zi lö hede-hede ba lafoʼaka niha enaʼö lamane, ”No marongo hewisa wangoʼayania Moze hegöi Lowalangi.” 12 Lafaweʼe niha sato, ira sondröniaʼö hegöi sangila amakhoita. Laʼondrasi ia ba laraʼu, lafaso wolohe föna Zangetuʼö Huku. 13 Aefa daʼö, lafakaoniʼö zamaduhuʼö sofaya sangumaʼö, ”Lö ibato niha daʼa wangobousi nahia niʼamoniʼö andre hegöi Oroisa Moze. 14 Duma-dumania, no marongo me iwaʼö wa Yesu niha Nazareta andrö idudugö nahia daʼa ba ibulöʼö zi toʼölö tafalua nifahaʼö Moze khöda.”
15 Fefu zi dadao ba gurusi Zangetuʼö Huku latöngö Zitefano, laʼila zikhalania no ohau-hau hulö mbawa malaʼika.