Halöwö Zinenge
8 Fao dödö Zaulo me labunu Zitefano.+
Me luo daʼö, ibörögö göna folohi sabölö-bölö mbanua niha Keriso ba Yeruzalema. Oi zara muzawili zato ba zi sagörö Yudea hegöi Samaria, hatö ira sinenge zi toröi.+ 2 Lakoʼo Zitefano ira sangataʼufi Lowalangi ba abu sibai dödöra. 3 Gasa-gasa daʼö, ibörögö wamakao banua niha Keriso Saulo, möi ia ba nomo-omo misa, isöbi baero ndra alawe hegöi ira matua, aefa daʼö ibeʼe ira ba gurunga.+
4 Hewaʼae simanö, niha si no muzawili andrö laturiaigö duria somuso dödö moroi ba daromali Lowalangi ba mbanua nirugira.+ 5 Duma-dumania, möi Wilifo ba mbanua Zamaria,+ ibörögö wanuriaigö sanandrösa khö Keriso ba daʼö. 6 Niha sato si no owulo ba daʼö, laʼameʼegö tödö niwaʼö Wilifo, lafondrondrongo ba lafaigi dandra sahöli-höli dödö nifaluania. 7 Me luo daʼö, moʼira-ira malaʼika si lö sökhi, laheta ira ba mboto niha nifakaora.+ Aefa daʼö, ato niha sombuyu-mbuyu töla hegöi sakela-kela nifadöhö. 8 So waʼomuso dödö sebua ba mbanua andrö.
9 Ba mbanua daʼö, so samösa zotöi Simoni, niha sebua elemu. Ifotöi ia niha si pade, ba ahöli-höli dödö niha Zamaria khönia. 10 Fefu niha, iʼotarai ndraono irugi zatua, no toʼölö larongo-rongo ia ba lamane, ”Niha si Pade daʼa, so khönia Waʼabölö Lowalangi.” 11 Börö me no toʼölö ia wakelemusa, andrö ahöli-höli dödö niha ba ato zangataʼufi yaʼia. 12 Hizaʼi, me ituriaigö duria somuso dödö Filifo sanandrösa ba Wamatörö Lowalangi+ hegöi töi Yesu Keriso, ato zi faduhu tödö khönia ba labayagö ira idanö, he ira matua he ira alawe.+ 13 Faduhu göi dödö Zimoni, ba me no tebayagö ia idanö lö faröi ia khö Wilifo.+ Ahöli-höli dödönia wamaigi tandra salua awö halöwö safönu faʼabölö.
14 Me larongo ira sinenge ba Yeruzalema wa no latema daromali Lowalangi niha Zamaria,+ lafatenge Wetero faoma Yohane ba daʼö. 15 Ba mofanö zinenge si darua andrö ba mangandrö ira enaʼö latema geheha niʼamoniʼö niha Zamaria,+ 16 börö me samösa lö hadöi niha si no manema eheha ba gotaluara, ha ba döi Zoʼaya Yesu tebayagö ira idanö.+ 17 Aefa daʼö, latufa högö niha sato+ irege latema geheha niʼamoniʼö.
18 Me iʼila Simoni no latema geheha niʼamoniʼö me no latufa högö niha sato ira sinenge, iʼoroʼö khöra gefe 19 imane, ”Mibeʼe göi khögu waʼabölö daʼö, enaʼö tola ubeʼe ba niha böʼö geheha niʼamoniʼö na utufa högöra.” 20 Hizaʼi, imane khönia Fetero, ”Yafao ndraʼugö waʼamate ba gefemö andrö, börö me öwalinga tola muʼöli mbuala Lowalangi faoma kefe.+ 21 Lö hadöi tana khöu ba daʼa, börö me no iʼila nösi dödöu si tobini Lowalangi. 22 Börö daʼö, falalini gera-erau si lö sökhi ba andrö khö Yehowa,* maʼatö iʼefaʼö horöu ba gera-eramö si lö sökhi andrö. 23 Aboto ba dödögu wa yaʼugö andrö hulö gawökhu safeto ba sawuyu waʼalösökhi.” 24 Imane Simoni, ”Angandrö khö Yehowa salahigu enaʼö lö alua khögu niwaʼömi andrö.”
25 Me no laʼodödögö wamaduhuʼö taromali Yehowa,* mangawuli ira ba Yeruzalema, ba laturiaigö duria somuso dödö ba mbanua side-ide ba niha Zamaria.+
26 Hizaʼi, mohede malaʼika Yehowa*+ khö Wilifo, ”Ofanö miraya, ba lala si numalö ba Gaza iʼotarai Yeruzalema.” (Daʼa lala si lö niha-niha.) 27 Ba mofanö Wilifo. Hiza, so ba lala daʼö niha salawa faka ba Gaitiofia,* sohalöwö ba gödo ba samatörö okhöta Gandrake, ratu niha Gaitiofia. Iʼotarai wamosumange Lowalangi ba Yeruzalema,+ 28 iadaʼa mangawuli ia. No modadao ia ba gureta kudo, ebua linia wombaso nisura Yesaya samaʼeleʼö. 29 Humede geheha Lowalangi khö Wilifo imane, ”Oʼö gureta kudo andrö.” 30 Fagohi Wilifo ba zinga gureta andrö, irongo-rongo me ibaso nisura Yesaya samaʼeleʼö. Aefa daʼö manofu Wilifo, ”Hadia aboto ba dödöu nibasomö Pa?” 31 Itema li, ”Hewisa wa uʼila manö na lö sangombakha khögu?” Aefa daʼö iwaʼö khö Wilifo weʼamöi yawa ba gureta ba fao ira wedadao. 32 Ayati nibasonia yaʼia daʼö: ”Hulö mbiri-biri niʼohe ba naha wanaba; ba hulö mbiri-biri sahono niguti bu, lö hede-hedenia.+ 33 Sagötö me laʼailasi ia, lafalua khönia zi lö atulö.+ Börö me labunu ia ba gulidanö, haniha zanutunö hezo moroi mbörötania?”+
34 Imane salawa faka andrö khö Wilifo, ”Uʼandrö khöu, fatunö khögu, haniha nitutunö zamaʼeleʼö andre? Hadia yaʼia samösa mazui niha böʼö?” 35 Ibörögö fahuhuo Wilifo, iʼotarai ba ayati daʼö, ifaʼema khönia duria somuso dödö sanandrösa khö Yesu. 36 Ba dalu lala wofanöra, larugi nahia soya idanö. Imane salawa faka andrö, ”Hiza nidanö! Hadia daha-tahagu wa lö ubayagö ndraʼo idanö?” 37* —— 38 Iʼandrö enaʼö labatogö guretania aefa daʼö möi ira tou ba nidanö, ba ibayagö ia idanö Filifo. 39 Me kalua ira moroi ba nidanö, iʼohe Wilifo eheha Yehowa* ba lö iʼila ia saʼae salawa faka andrö. Itohugö wofanö salawa faka andrö si fao faʼomuso dödö, 40 na Filifo ba mbanua Gasoto so ia. Iʼanöröi fefu mbanua daʼö ba wanuriaigö turia somuso dödö irege ofeta ia ba Kaisarea.+