Halöwö Zinenge

7 Aefa daʼö manofu khönia gere sebua, ”Hadia sindruhu niwaʼöra andrö?” 2 Itema li Sitefano, ”Yaʼami ira talifusö, ira ama, mifondrondrongo niwaʼögu. Me so duada Aberahamo ba Mezofotamia fatua lö toröi ia ba Harana,+ ifalukhaisi ia Lowalangi sebua lakhömi, 3 imane, ’Hetaʼö ba danöu hegöi ba zi fahatö khöu, ba aeʼe ba danö niʼoromaʼögu khöu dania.’+ 4 Andrö mofanö ia moroi ba mbanua Galedaia ba toröi ia ba mbanua Harana. Aefa daʼö me no mate namania,+ ifatenge ia Lowalangi weʼamöi ba mbanua andre, si toröi ami iadaʼa.+ 5 Hewaʼae simanö, me luo daʼö lö ibeʼe khönia Lowalangi danö tana khönia ba daʼö. Ezai laluʼa löʼö. Hizaʼi, ifabuʼu khönia Lowalangi wa ibeʼe dana khönia mbanua andrö hegöi khö ndra maʼuwunia,+ hewaʼae lö ono Gaberahamo me luo daʼö. 6 Aefa daʼö, ifatunö khönia Lowalangi wa tobali si fatewu maʼuwunia ba mbanua böʼö, laʼosawuyu ba lafakao ira ba daʼö sagötö zi 400 fakhe faʼara.+ 7 Hizaʼi imane Lowalangi, ’Uhuku soi sangosawuyu yaʼira,+ ba aefa daʼö, mangawuli ira ba lafalua halöwö niʼamoniʼö khögu ba daʼa.’+

8 ”No göi ifabuʼu khönia Lowalangi mbuʼusa li ba wosuna,+ andrö isuna nononia Aberahamo sotöi Izaʼaki+ ba ngaluo si walu.+ Aefa daʼö, moʼono Gizaʼaki yaʼia daʼö Yakobo,* ba moʼono Yakobo yaʼia zi 12 mado. 9 Afökhö dödöra khö Yosefo+ ba lafamawa ia ba danö Miserai.+ Hizaʼi, fao khönia Lowalangi,+ 10 iʼefaʼö ia moroi ba wamakao andrö fefu. Ibeʼe khönia waʼatua-tua Lowalangi ba iʼomasiʼö ia Faraʼo, razo Miserai. Aefa daʼö, ifataro ia Faraʼo ba wamatörö Miserai hegöi si sambua omo razo.+ 11 Ba gafuriata, göna lofo sabölö-bölö danö Miserai hegöi Kanaʼana, afönu famakao, ba lö lasöndra mbalazora ira tuada.+ 12 Hizaʼi, no irongo Yakobo wa fahöna mbalazo* ba Miserai, andrö ifatenge ndra tuada ba daʼö si oföna sibai.+ 13 Me möi ira ba zi mendrua kali, ifatunö ia Yosefo khö ndra talifusönia, daʼö mbörö wa iʼila Faraʼo+ nösi nomo Yosefo. 14 Aefa daʼö, iʼoroisi Yosefo enaʼö möi namania Yakobo awö nösi nomonia+ fefu si 75 niha waʼato.+ 15 Möi Yakobo ba danö Miserai+ irege ba daʼö mate ia,+ simanö göi ndra tuada.+ 16 Laʼohe ba Zikhema döla ndra tuada andrö, lakoʼo ba lewatö niʼöli Gaberahamo khö ndraono Hemori ba Zikhema.+

17 ”Me no arakhagö irugi inötö waʼalua nifabuʼu Lowalangi khö Gaberahamo, monönö waʼato soi andrö ba itugu ato manö nasa ira ba danö Miserai, 18 irege tohare razo böʼö samatörö Miserai, si lö mangila haniha Yosefo.+ 19 Obou dödö razo daʼa ba soida, ifakao ira, ba ifaso ndra tuada waniboʼö onora sawuyu enaʼö mate.+ 20 Me luo daʼö tumbu Moze, ba no siga-siga.* Tölu waŵa laʼebuaʼö ia ba nomo namania.+ 21 Hizaʼi me latiboʼö ia,+ ihalö ba iʼebuaʼö ia ono Waraʼo ono alawe, hulö nononia samösa.+ 22 Börö daʼö, lafahaʼö Moze sanandrösa ba waʼatua-tua niha Miserai. Onekhe sibai ia fahuhuo hegöi na so nifaluania.+

23 ”Me 40 fakhe ndröfinia, ihalö gangetula* weʼamöi mamaigi ira talifusönia, iraono Gizaraʼeli.+ 24 Me iʼila samösa niha Miserai samakao talifusönia, faʼawö ia, ilau mbalö irege mate niha Miserai andrö. 25 Iwalinga laʼila ira talifusönia wa yaʼia nifili Lowalangi ba wangefaʼö yaʼira, hizaʼi lö aboto ba dödöra. 26 Mahemolunia, ifalukhaisi ndra talifusönia si no faʼudu, iʼatulöʼö ira imane, ’Yaʼami andrö si fatalifusö. Hana wa faʼudu ami?’ 27 Hizaʼi, samösa zamözi awönia no mege, ituliʼö Moze ba imane, ’Haniha zamataro yaʼugö tobali samatörö ba sanguhuku yaʼaga? 28 Hadia öbunu göi ndraʼo simane me öbunu niha Miserai daʼö menewi?’ 29 Me irongo daʼö Moze, ilau moloi ba fatewu ia ba mbanua Midiano. Ba daʼö, tumbu khönia darua nono matua.+

30 ”Me no irugi 40 fakhe, so malaʼika sangondrasi yaʼia ba danö si mate ahatö ba Hili Zinaʼi, ba hola-hola galitö ba ngafu ndruʼu sodoi.+ 31 Ahöli dödö Moze me iʼila daʼö. Me ihatöʼö ia wamaigi, irongo li Yehowa* me imane, 32 ’Yaʼodo Lowalangi ndra tuamö, Lowalangi Gaberahamo, Lowalangi Gizaʼaki, Lowalangi Yakobo.’+ Ibörögö manizi Moze ba lö itohugö wamaigi saʼae. 33 Imane khönia Yehowa,* ’Heta zandrala ba gahemö börö me tanö niʼamoniʼö zi so yaʼugö. 34 No uʼila hewisa me tefakao nono mbanuagu ba danö Miserai, no urongo wangarö-ngaröra+ ba no tohare ndraʼo ba wangefaʼö yaʼira. Iadaʼa, ufatenge ndraʼugö ba danö Miserai.’ 35 Moze andre mböröta nitimbagöra me lawaʼö, ’Haniha zamataro yaʼugö tobali samatörö ba sanguhuku yaʼaga?’+ Yaʼia nifatenge Lowalangi+ tobali sondröniaʼö ba sangefaʼö nifaʼema malaʼika khönia me falukha ira ba ngafu ndruʼu sodoi. 36 Iʼefasi ira+ ba oya ngawalö zahöli-höli dödö hegöi tandra nifaluania ba danö Miserai,+ ba Nasi Soyo+ hegöi ba danö si mate sagötö zi 40 fakhe.+

37 ”Moze andrö zangumaʼö ba ndraono Gizaraʼeli, ’Ituyu samösa zamaʼeleʼö Lowalangi moroi ba soida ba wanolo yaʼami, samaʼeleʼö simane yaʼo.’+ 38 Yaʼia zi so ba gotalua ndraono Gizaraʼeli ba danö si mate, awö malaʼika+ si fahuhuo khönia+ ba Hili Zinaʼi hegöi ira tuada, ba no itema wehede niʼamoniʼö safönu faʼabölö enaʼö tarongo.+ 39 Hizaʼi, lö larongo niwaʼönia ira tuada. Latimbagö ia+ ba so ba dödöra waʼedöna mangawuli ba danö Miserai.+ 40 Lamane khö Gaʼaroni, ’Fazökhi khöma lowalangi samatörö yaʼaga. Lö maʼila hadia zalua khö Moze, niha sangefaʼö yaʼaga moroi ba danö Miserai andrö.’+ 41 Börö daʼö, lafazökhi khöra nadu ono zawi ba labeʼe zumange khö nadu andrö. Aefa daʼö, laʼowasaini zi no lafazökhi andrö.+ 42 Andrö iröi ira Lowalangi ba itehegö khöra wanömba ösi dalu mbanua+ simane Nisura Ndra Samaʼeleʼö yaʼia daʼö, ’Yaʼami iraono Gizaraʼeli, no mibeʼe ngawalö zumange ba danö si mate sagötö zi 40 fakhe, hizaʼi tenga khögu mibeʼe daʼö. 43 Niʼoza-ozaʼömi andrö ose Molokho+ hegöi döfi lowalangi Refano, adu si no mifazökhi enaʼö misömba. Börö daʼö, utiboʼö ami ba nahia sabölö aröu moroi ba Mbabilona.’+

44 ”So khö ndra tuada nose Lowalangi ba danö si mate, nifazökhi simane niwaʼö Lowalangi khö Moze, moloʼö duma-duma niʼila Moze.+ 45 Latema daʼö ira tuada tobali tana khöra ba fao ira Yosua ba wolohe ba soi böʼö+ si no ifofanö Lowalangi föna ndra tuada.+ Lö si tebulö ba daʼa irugi götö Dawido. 46 Iʼomusoiʼö dödö Lowalangi Dawido ba iʼandrö enaʼö labeʼe khönia halöwö si sökhi ba wamazökhi omo Lowalangi Yakobo.+ 47 Hizaʼi samazökhi omo andrö khönia yaʼia daʼö Selomo.+ 48 Hewaʼae simanö, lö toröi Wondrege Zalawa ba nomo nifazökhi danga niha,+ simane nisura zamaʼeleʼö yaʼia daʼö, 49 ’Dadaomagu zorugo+ ba dane-dane gahegu gulidanö.+ Hadia nomo nifazökhimi khögu? iwaʼö Yehowa.* Mazui, hezo nahia waʼatoröigu? 50 Hadia tenga tangagu zamazökhi fefu?’+

51 ”Yaʼami niha sabeʼe högö, si no teduhö tödö awö dalinga. Lö mibato wolawa eheha niʼamoniʼö simane ira tuami.+ 52 Haniha zamaʼeleʼö si lö lafakao ira tuami?+ Labunu zanuriaigö faʼatohare niha satulö andrö.+ No miʼa mbölinia ba mibunu ia iadaʼa.+ 53 No mitema Goroisa Moze nifaʼema ndra malaʼika,+ hizaʼi lö nifaluami.”

54 Me larongo daʼö, aukhu dödöra ba ibörögö lafatangi mbohara ba latöngö ia. 55 Hizaʼi, ifaöga ia Sitefano safönu eheha niʼamoniʼö ba wamaigi talu mbanua, oroma khönia lakhömi Lowalangi. Ba iʼila göi Yesu, no mozizio ia ba gambölö Lowalangi.+ 56 Imane Sitefano, ”Uʼila teboka mbanua, ba no mozizio Nono niha+ ba gambölö Lowalangi.”+ 57 Me larongo daʼö, ebua lira weʼao ba laduhö dalingara, lahurufai ia ba wanuwö yaʼia. 58 Laʼohe ia baero moroi ba mbanua andrö ba latebu ia kara.+ Ira samaduhuʼö+ samobahulu yaʼia, lahalö mbarura, labeʼe ba zinga gahe nono matua sotöi Saulo.+ 59 Me latebu kara Zitefano mangandrö ia imane, ”He Soʼaya Yesu, tema nosogu.” 60 Aefa daʼö, muʼao ia ituhi danö, ”He Yehowa,* böi huku ira ba zalara andre.”+ Me no aefa iwaʼö daʼö, mate ia.*