Hewisa Lala Enaʼö Ohahau Dödö ba zi Sambua Omo?

1. Hana wa moguna wangowalu si sökhi enaʼö ohahau dödö ba zi sambua omo?

Moroi khö Yehowa duria somuso dödö andrö, Lowalangi sohahau tödö. Omasi ia enaʼö ohahau dödö niha ba zi sambua omo. (I Timoteo 1:11) Yaʼia zamobörö fongambatö. Moguna wangowalu satulö enaʼö ohahau dödöra ba wangebua iraono ba zi sökhi. Moguna lafasuraʼö ba laʼoʼö goi-goi nibeʼe ndra famareta na mangowalu niha keriso.​—Baso Luka 2:1, 4, 5.

Hewisa wamaigi Lowalangi fangowalu? Omasi ia na fangowalu andrö tobali böbö saro ba sanau ölö ba gotalua zi samösa ira alawe ba samösa ndra matua. Omasi Yehowa na lö faröi zi no mangowalu. (Heberaiʼo 13:4) Fatuwu ia na fabali zi faronga. (Maleakhi 2:16) Hizaʼi, itehegö fabali zifaronga ba tola ifuli mangowalu na fazamösa ba gotaluara mamalua horö.​—Baso Mataiʼo 19:3-6, 9.

2. Hewisa zinangeania gamuata ndra alawe ba ira matua khö ngambatönia?

Ifazökhi Yehowa ndra alawe ba ira matua enaʼö faoma latolo nawöra. (I Moze 2:18) Foʼomo ira matua zi tobali högö ba nomo, andrö wa sinangea yaʼia zangaʼasogö soguna ba nomo ba ifahaʼö nösi nomonia ba woloʼö khö Lowalangi. Iforomaʼö waʼomasinia soroi ba dödö khö woʼomonia ira alawe. Faoma laʼomasiʼö ba lafosumange nawöra. Börö me lö soʼahonoa ira, andrö wa moguna so khöra waʼebolo dödö. Daʼö lala enaʼö so waʼohahau dödö ba zi sambua omo.​—Baso Efeso 4:31, 32; 5:22-25, 33; I Fetero 3:7.

3. Hadia tola fabali zi no mangowalu na lö khöra faʼohahau dödö?

Na so gabula dödö ba zi no mangowalu, moguna lafalua gamuata si sökhi ba faʼomasi khö nawöra. (I Korindro 13:4, 5) Lö ifarou ita Taromali Lowalangi wabalisa na so gabula dödö salua ba zi no mangowalu.​—Baso I Korindro 7:10-13.

4. Yaʼami iraono, hadia gohitö dödö Lowalangi khömi?

Omasi Yehowa na ohahau dödömi. Ituturu lala si sökhi khömi enaʼö misöndra waʼowua-wua dödö. Omasi ia na miʼoʼö li zatuami börö me oya zi no latörö ba waʼauri andre. (Kolose 3:20) Omasi Lowalangi na ohahau dödömi börö me mifalua zomasi ia.​—Baso Zangombakha 11:9–12:1; Mataiʼo 19:13-15; 21:15, 16.

5. Yaʼami satua hadia zoguna ba ndraonomi enaʼö ohahau dödöra?

Moguna laʼodödögö wohalöwö ba wombönökhi soguna khöra, niʼa, niʼonukha, ba nahia omo. (I Timoteo 5:8) Ba hizaʼi, enaʼö ohahau dödöra, moguna öfahaö ira ba wangomasiʼö Lowalangi ba lafahaʼö ira ba Daromalinia. (Efeso 6:4) Duma-duma nibeʼeu khöra ba wangomasiʼö Lowalangi daʼö zangoʼou tödöra. Na öfahaö ira ba Daromali Lowalangi daʼö zi tobali famarou dödöra.​—Baso V Moze 6:4-7; Gamaedola 22:6.

Moguna ba ndraono wehede famarou dödö. Moguna göi öbeʼe khöra degu-degu. Famahaö simane daʼö zolumöʼö yaʼira enaʼö lö aekhu ira ba gabula dödö. (Gamaedola 22:15) Hizaʼi, böi beʼe khöra degu-degu sabölö abeʼe ma si tetutu ba dödöra.​—Baso Kolose 3:21.

Lafazökhi mbuku ira Samaduhuʼö Yehowa soguna ba wanolo satua hegöi iraono. Buku daʼa teʼodane-dane moroi ba Zura Niʼamoniʼö.​—Baso Zinunö 19:8, 12.