Ondröita si Tobali Okhöta Yakobo

Me no irugi 40 fakhe ndröfi Gizaʼaki mangowalu ia khö Rebeka. Iʼomasiʼö sibai Rebeka. Samuza inötö, tumbu khöra nono matua si faero.

Siaʼa töinia Ezau, ba siakhi töinia Yakobo. Ha fataria na so ba nomo Gezau ba onekhe sibai ia weʼamöi malu ba ndruʼu. Hizaʼi omasi Yakobo waʼatoröi ba nomo.

Me luo daʼö, ono siaʼa zabölö ebua manema kefe hegöi tanö na mate namania. Lafotöi daʼö, ondröita. Ba nösi nomo Gizaʼaki fao ba daʼö gondröita nifabuʼu Yehowa khö Gaberahamo. Lö iʼameʼegö tödö Ezau mbuʼusa li daʼö, hizaʼi aboto ba dödö Yakobo wa moguna sibai.

Samuza maʼökhö, no erege dödö Gezau weʼamöi malu maʼö-maʼökhö. Me irugi nomo, iʼago hua gö sami nirino Yakobo ba imane, ’Olofodo sibai! Omasido uʼa bubu soyo-oyo daʼö!’ Imane Yakobo, ’Tola sa, hizaʼi fabuʼu khögu ua sakali wa öbeʼe khögu gondröitamö.’ Imane Ezau, ’Halö manö, lö ba dödögu gondröitagu! Daʼö zomasido iadaʼa, manga.’ Moloʼö yaʼugö, hadia sökhi nifalua Gezau andrö? Löʼö. No ifalalini zabölö ebua böli Ezau ha ba zi sambua mako bubu.

Me no atua Gizaʼaki, omasi ia ibeʼe howu-howu khö nononia siaʼa. Hizaʼi itolo Rebeka nononia sabölö awuyu-wuyu ba wanema howu-howu daʼö. Me iʼila daʼö Ezau, mofönu sibai ia ba edöna ibunu nakhinia andrö. Omasi Gizaʼaki hegöi Rebeka ba wolumöʼö Yakobo. Andrö lamane khönia, ’Ofanö khö Labano gaʼa ninau, ba daʼö agö irege alö wönu Gezau.’ Iʼoʼö Yakobo niwaʼö zatuania ba mofanö ia ba daʼö.