Mangandrö Khana Enaʼö So Nononia

So samösa ndra matua Gizaraʼeli sotöi Elikana ba darua woʼomonia, Khana ba Fenina. Hizaʼi, abölö iʼomasiʼö Khana. Mangoʼaya sibai Fenina khö Khana börö me lö hadöi ononia, na Fenina oya nononia. Ero röfi, möi ba nose Lowalangi Elikana iʼohe fefu nösi nomonia ba Zilo ba wamosumange Lowalangi. Samuza inötö me so ira ba daʼö, iʼila wa abu sibai dödö Khana. Imane, ’Böi ege-ege bale, Khana. So nasa ndraʼodo. Omasido ndraʼugö.’

Aefa daʼö, möi mangandrö Khana. Iʼandrö tolo khö Yehowa si fao fege-ege. Fazazi ia, ’He Yehowa, na öbeʼe khögu nono ba uʼamualagö ia khömö, ihalö halöwö ba wamosumange yaʼugö sagötö faʼaurinia.’

Iʼila Ere Sebua sotöi Eli waʼabu dödö Khana, iwalingagö no mabu Khana. Imane khönia Khana, ’Lö si mabu ndraʼodo Tua. So gabula dödögu sebua, daʼö nidunö-dunögu khö Yehowa.’ Awena aboto ba dödö Eli wa fasala wehedenia ba imane, ’Yaʼibeʼe zomasi ndraʼugö Lowalangi.’ Isöndra waʼahono dödö Khana aefa daʼö mangawuli ia. Ambö döfi, no tumbu khönia ndraono. Ibeʼe töi Samueli. Hadia tola ökhalaigö hewisa waʼomuso dödö Khana?

Lö olifu Khana zi no izazi khö Yehowa. Iʼohe Zamueli ba nose Lowalangi me lö mamaenu ia saʼae, ba daʼö toröi Zamueli ba wamosumange Lowalangi. Imane Khana khö Eli, ’Yaʼe nono niʼandrögu ba wangandrö. Omasido ufafizaʼö ia khö Yehowa sandrohu faʼaurinia.’ Ero röfi, möi lafalukhaisi Zamueli ira satuania ba laʼohe mbaru si bohou khönia. Ibeʼe Yehowa nono khö Khana, tölu tö nono matua ba dombua nono alawe.