Mangawuli Yesu ba Zorugo

Ifalukhaisi ndra nifahaʼönia Yesu ba Galilaia. Ibeʼe khöra fareta daʼa, ’Miʼaeʼe mibaliʼö nifahaʼögu fefu niha moroi ba ngawalö soi. Mifahaʼö ira hadia zi no ufahaʼö ami fefu, ba mibayagö ira idanö.’ Aefa daʼö fazazi ia, ’Mitörö-törö tödömi wa fao-fao ndraʼo khömi.’

Sagötö zi 40 hari me no tesusugi ia, ngaotu ndra nifahaʼö nifalukhaisi Yesu ba Galilaia hegöi ba Yeruzalema. Oya ngawalö zinangea ifahaʼö ira ba oya göi ifalua dandra sahöli-höli dödö. Safuria sibai, falukha Yesu khö ndra sinengenia ba Hili Zaitu. Imane khöra, ’Böi miröi Yeruzalema. Mibaloi hadia zi no izazi Ama.’

Hizaʼi, lö aboto ba dödö ndra sinenge wehedenia. Andrö manofu ira, ’He Tua, hadia iadaʼa tobali ndraʼugö Razo Gizaraʼeli?’ Imane khöra Yesu, ’No itatugöi Yehowa hawaʼara tobali ndraʼo Razo, ba tenga nasa inötönia iadaʼa. Lö ara tö tebeʼe khömi waʼabölö geheha niʼamoniʼö ba tobali ami samaduhuʼö khögu. Mituriagö duria somuso dödö ba Yeruzalema, Yudea, Zamaria ba irugi wondrege danö.’

Lö ara tefazawa manö Yesu ba dalu mbanua, ibalugö ia lawuo. No latöngö manö dalu mbanua ira nifahaʼö, hizaʼi lö yaʼia saʼae.

Aefa daʼö mofanö ira laröi Hili Zaitu numalö ba Yeruzalema. Asese owulo ira wangandrö ba mbateʼe tanö yawa ba zi sambua omo. Labaloi wanuturu lala nibeʼe Yesu aefa daʼö.