Hadia So Zamondro-ndrongo Fangandrö?

Ato niha sangumaʼö na mangandrö ita ha fangohori ginötö, ba lö hadöi samondro-ndrongo. Samösa niha si lö agama, itandraigö ikhalaigö Lowalangi aefa daʼö, mangandrö ia imane, ”He Lowalangi ngöngögö maʼifu ba dalingagu wa so ndraʼugö.” Hizaʼi, ”lö idema-dema ligu” Lowalangi.

Sura Niʼamoniʼö zameʼe khöda faʼafaduhu dödö wa so zamondro-ndrongo fangandröda. Iʼombakhaʼö khöda sanandrösa ba zi sambua soi me föna, ”Ihakhösi tödö sa ami, ba wangarö-ngarömi andrö, na irongo, ba iʼoʼö khömi.” (Yesaya 30:19) Ayati böʼö imane, ”Ba fangandrö zadölö tödö, ba omasi ia.”​—Gamaedola 15:8.

Idunö-dunö khöda Sura Niʼamoniʼö duma-duma wangandrö niha si no tefondro-ndrongo. So sambua ayati zangumaʼö wa Yesu ”no iʼohe wangandrö, . . . khö zangila mangefaʼö” ba ”no mufondro-ndrongo linia.” (Heberaiʼo 5:7) Duma-duma tanö böʼö tola tabaso ba Danieli 9:21, II Ngaʼötö 7:1.

Hana wa ato niha sangumaʼö wa lö tefondro-ndrongo wangandröra? Enaʼö tefondro-ndrongo wangandröda, moguna mangandrö ita khö Lowalangi si ndruhu sotöi Yehowaa si no tesura ba Zura Niʼamoniʼö tenga ba Lowalangi böʼö mazui khö ndra tuada me föna. Omasi göi Lowalangi enaʼö fangandröda ”si faudu ba zomasi ia.” Ibeʼe khöda waʼafaduhu dödö wa ”ifondro-ndrongo” wangandröda. (I Yohane 5:14) Enaʼö tefondro-ndrongo wangandröda, moguna aboto ba dödöda Lowalangi si ndruhu si no tesura ba Zura Niʼamoniʼö ba taʼodödögö wamalua somasi ia.

Ato niha si faduhu tödö wa fangandrö tenga börö me no toʼölö lafalua ba agama si so yaʼira. Hizaʼi, so zamondro-ndrongo fangandrö yaʼia daʼö Lowalangi. Imane Isaac moroi ba Kenya: ”Ulau mangandrö enaʼö aboto ba dödögu nösi Zura Niʼamoniʼö. Lö ara aefa daʼö, so samösa niha sangondrasi yaʼo ba ibeʼe khögu wamahaʼö ba Zura Niʼamoniʼö.” Hilda moroi ba Filipina, omasi ibato woroko. No hauga kali edöna ibato, hizaʼi tebai iröi. Imane woʼomonia ira matua, ”Hana wa lö öʼandrö wanolo khö Lowalangi ba wangandrö?” Ifalua hadia niwaʼö woʼomonia, ba gafuriata imane, ”Ahöli-höli dödögu hewisa wanolo Lowalangi ndraʼo. Lö itörö tödögu woroko, no ubato saʼae.”

Hadia ifondro-ndrongo wangandröda Lowalangi na tefaudu ba zomasi ia?