Hadia Gunania Khöu na Aboto ba Dödöu Lowalangi?

No taʼila wanema li moroi ba wanofu, Haniha Lowalangi? No taʼila ba Zura Niʼamoniʼö wa töinia Yehowa ba bua-buania si oföna yaʼia daʼö faʼomasi. No göi mututunö hadia manö zi no ifalua hegöi si lö ara tö ifalua ba niha gulidanö maʼafefu. Oya nasa danö böʼö zinangea tafahaʼö ita khö Lowalangi. Hizaʼi, te manofu-nofu dödöu, ’Hadia gunania na ufahaʼö ndraʼo sanandrösa khö Lowalangi?’

Ifabuʼu Yehowa ’na öʼaluido, utehegö ösöndra ndraʼo’. (1 Ngaʼötö 28:9) Na öforege enaʼö aboto ba dödöu Lowalangi, hasambalö ”fahuwu” ndraʼugö khönia. No buala sebua daʼö. (Sinunö 25:14) Hadia manö mbua nitemau me fahuwu ndraʼugö khönia?

Faʼohahau dödö sindruhu. Yehowa andrö ”Lowalangi somuso tödö”. (1 Timoteo 1:11) Na fahuwu ndraʼugö khö Lowalangi ba öʼoʼö mbua-buania, sindruhu-ndruhu ohahau dödöu. Buania, lö göna ndraʼugö fökhö wangera-ngera, lö abula dödö ba lö mofökhö ndraʼugö. (Sinunö 33:12) Tola göi monönö waʼohahau dödöu börö me no ifahaʼö ndraʼugö Lowalangi ba wamalua si sökhi, ba wondrorogö fahuwusa ba niha böʼö hegöi ba wanimbagö lala waʼauri si fasala. Tatu fao dödöu niwaʼö zanura sinunö, ”Faʼohahau dödö khögu na ahatö ndraʼo khö Lowalangi.”—Sinunö 73:28.

Iʼameʼegö tödö ita zamösana. Ifabuʼu Yehowa ba niha samosumange yaʼia, ”Ubeʼe khöu wotu ba uʼameʼegö tödö wamaigi yaʼugö.” (Sinunö 32:8) Eluahania, iʼameʼegö tödö Yehowa niha samosumange yaʼia ero samö-samösa ba ibeʼe hadia zoguna khöra. (Sinunö 139:1, 2) Na no fahuwu ndraʼugö khö Yehowa, örasoi wa lö tebulö fao-fao ia khöu.

Fanötöna sahöli-höli dödö ba zi so miföna. Tenga ha itolo ndraʼugö Lowalangi Yehowa ba wangokhögö faʼohahau dödö hegöi faʼahono dödö iadaʼa. Hizaʼi, ibeʼe göi wanötöna sahöli-höli dödö ba zi so miföna. (Yesaya 48:17, 18) Imane Sura Niʼamoniʼö, ”Daʼö waʼauri si lö aetu, enaʼö aboto ba dödöra ndraʼugö, Lowalangi sindruhu si ha sambua, ba enaʼö aboto ba dödöra nifatengeu andrö, Yesu Keriso.” (Yohane 17:3) Iadaʼa, no so ita ba ginötö si lö sökhi. Fanötöna si no ibeʼe Lowalangi daʼö zi tobali sao ”sabölö ba si tola taʼodaligö”.—Heberaiʼo 6:19.

Oya nasa danö böʼö zi tobali dane-dane wa moguna aboto ba dödöda Lowalangi ba taʼokhögö wahuwusa si sökhi khönia. Enaʼö öʼila danö böʼönia nasa, tola manofu ndraʼugö khö zi samösa Samaduhuʼö Yehowa mazui bokai situs web jw.org/nia.