Lö Hadöi si Tola Aefa ba Waʼamate

KHALAIGÖ atö, so sambua film nifaigimö sanandrösa khö zi samösa sanunö si tehöngö nisuno-sunomö. Tebörögö film daʼö iʼotarai me ide-ide ia, me ifahaʼö ia ba musik. Iforege wamahaʼö yaʼia, ibörögö manunö föna niha sato, ba iʼanöröi mbanua soya irege tehöngö ia ba zi sagörö ulidanö. Lö ara aefa daʼö, iforomaʼö khöda ba gafuriata film daʼö wa mate ia.

Sindruhu-ndruhu alua nitutunö ba film daʼa. He niha sonekhe ba musik, ilmuwan, atlet, mazui niha si tehöngö, fagölö-gölö zalua khöra. Hewaʼae oya zi sökhi nifalua zi samösa niha, hizaʼi abölö oya nasa zi tola ifalua na lö atua ia mazui mate.

Tatu abu sibai dödöda na taʼangeragö zalua andrö si lö tola löʼö alua khöda. (Zangombakha 9:5) Hewaʼae no taforege wanimbagö yaʼia, hasambalö atua ba mate ita. Tola manö mate ita börö wökhö mazui salua si lö mudöna-döna. Simane nitutunö ba Zura Niʼamoniʼö, yaʼita andre amaedola zau sihulö wongi ”si tohare sabata aefa daʼö taya”.​—Yakobo 4:14.

Börö me tola manö mate ita ba ginötö si lö mudöna-döna, ato niha sangokhögö fangera-ngera simane daʼa, ”Datalau manga-manga ba mamadu-madu, börö me mate ita mahemolu.” (1 Korindro 15:32) Hizaʼi, ato niha samalua daʼö börö me laʼila wa hasambalö mate ira ba lö laʼokhögö dötönafö ba zi so miföna. Na alua wangabu dödö ba zi samösa niha, tola manö manofu ia, ’Hadia simane daʼa manö waʼauri andre?’ Hezo tola ösöndra wanema linia?

Ato niha sodöna-döna enaʼö lasöndra wanema linia ira ilmuwan. Sindruhu sa, tola monönö waʼanau noso niha börö me itugu tedou waʼatua-tua niha hegöi ira doto. Iadaʼa, so ösa ndra ilmuwan samorege ba wangalui lala enaʼö monönö waʼanau noso niha. Gofu hadia zi no lafalua, so nasa wanofu si lö mubeʼe fanema li: Hana wa atua ita ba mate? Hadia tola taya waʼamate si no tobali ududa? Ba majalah daʼa, mututunö dania wanema linia hegöi fanema li moroi ba wanofu: Hadia simane daʼa manö waʼauri andre?