Tola Ösöndra Waʼohahau Dödö Iadaʼa
SAMUZA inötö dania, lö hadöi saʼae fökhö, faʼatua mazui faʼamate. Tola öʼokhögö waʼauri simane daʼö. Hizaʼi, oya nasa gabula dödö hegöi famakao salua iadaʼa. Hadia zanolo yaʼita enaʼö tasöndra waʼohahau dödö iadaʼa? No ibeʼe wanuturu lala Sura Niʼamoniʼö enaʼö ösöndra waʼomuso dödö ba faʼahono dödö ba waʼauri. Datafaigi hadia mene-mene moroi ba Zura Niʼamoniʼö.
FAʼAHONO DÖDÖ
Mene-Mene Zura Niʼamoniʼö: ”Böi miʼomasiʼö gefe ba mihonogö dödömi ba zi no so.”—Heberaiʼo 13:5.
Iadaʼa, ato niha sangumaʼö wa oya zinangea taʼokhögö ba waʼauri andre. Hizaʼi, iwaʼö Sura Niʼamoniʼö enaʼö ’ahono dödöda ba zi no so’. Hewisa lalania?
Timbagö ”waʼomasi gefe”. So niha si lö moʼameʼegö tödö faʼaurira, ösi nomora, fahuwusara, amuatara hegöi töira ha börö wangomasiʼö kefe. (1 Timoteo 6:10) Lö eluaha fefu daʼö! Ba gafuriata, ”tebai abuso” niha sangomasiʼö harato.—Zangombakha 5:9.
Ameʼegö tödö niha tenga gama-gama. Sindruhu sa, so ösa gama-gama soguna ba waʼaurida. Hizaʼi, tebai laʼomasiʼö mazui laʼandrö khöda saohagölö; ha niha zi tola mamalua daʼö. Na taʼokhögö ’zindruhu si fahuwu’, daʼö zanolo yaʼita ba wanöndra faʼomuso dödö ba waʼauri.—Gamaedola 17:17.
TOLA TASÖNDRA WAʼOHAHAU DÖDÖ IADAʼA NA TAʼOʼÖ WANUTURU LALA BA ZURA NIʼAMONIʼÖ
BA WANAÖGÖ FÖKHÖ
Mene-Mene Zura Niʼamoniʼö: ”Faʼomuso dödö, ba tobali fangorifi.”—Gamaedola 17:22.
Amaedola dalu-dalu si sökhi waʼomuso dödö andrö ba möi fanoloda ba wanaögö fökhö. Hizaʼi hewisa wa tola tasöndra waʼomuso dödö na mofökhö ita?
Fangandrö saohagölö. Tola monönö gabula dödöda na ha daʼö manö niʼangeragöda. (Gamaedola 15:15) Hizaʼi, ”böi mifamalö-malö wangandrö saohagölö”, iwaʼö Sura Niʼamoniʼö. (Kolose 3:15) Tafomaha ita wangandrö saohagölö ba zi sökhi si no tarasoi hewaʼae no ide-ide. Tasöndra waʼomuso dödö na tafaigi hawaʼasökhi na aekhu haga luo, na tarasoi hoho nangi hegöi na maʼiki niha niʼomasiʼöda.
Falua zi tola öfalua ba niha böʼö. Hewaʼae mofökhö ita, hizaʼi ”ohahau dödö ba wameʼe moroi ba wanema”. (Halöwö Zinenge 20:35) Na laʼandrö khöda saohagölö ba zi no tafalua, omuso dödöda ba lö saʼae taʼangeragö sibai gabula dödö andrö. Itugu sökhi waʼaurida na tatolo niha böʼö enaʼö lasöndra göi waʼauri si sökhi.
BA WANGAROʼÖ FONGAMBATÖ
Mene-Mene Zura Niʼamoniʼö: ”Mitatugöi hadia zabölö moguna.”—Filifi 1:10.
Tola manö lö aro wongambatö niha na lö oya ibeʼe ginötönia khö ngambatönia. Börö daʼö, foʼomo ira matua hegöi ira alawe, moguna laʼofönaiʼö wongambatöra ba waʼaurira.
Mifao wamalua hadia ia. Moroi na mifalua halöwömi ero samösa, baga na fao ami ba wamalua hadia ia. Abölö sökhi ’na darua moroi na ha samösa’ iwaʼö Sura Niʼamoniʼö. (Zangombakha 4:9) Tola fao ami wondrino, faʼolahraga, modadao ba wamadu kofi mazui ba wamalua somasi dödömi.
Foromaʼö waʼomasi. Ibeʼe wamarou dödö Sura Niʼamoniʼö khö woʼomo ira matua hegöi ira alawe enaʼö faoma laʼomasiʼö ba lafosumange nawöra. (Efeso 5:28, 33) Na maʼiki ndraʼugö khönia, na ötalagui ia mazui na öbeʼe mbuala side-ide, daʼö zangaʼaroʼö fongambatömi. Mifalua göi waʼorudu ha khö ngambatömi.—Heberaiʼo 13:4.