Böi Böhöli Wangaʼi Halöwö khö Lowalangi
1. Hadia duma-duma si tola tahalö khöda moroi ba Niha Keriso si föföna enaʼö tola itugu tedou ita ba wanuriaigö?
1 Niha Keriso sangaʼi halöwö khö Lowalangi, moguna enaʼö tedou ira ba waʼatua-tua sanandrösa ba wanuriaigö. Daʼö mbörö wa ifahaʼö ndra nifahaʼönia Yesu enaʼö itugu tedou ira ba wanuriaigö. (Luka 9:1-5; 10:1-11) Börö daʼö, Akuila ba Ferekila laʼandrö Afolo ba ”laʼohe ia khöra ba lahaogö wamotokhi khönia goroisa Lowalangi”. (Halöwö Zinenge 18:24-26) Börö me no toʼölö Waulo ba wanuriaigö, ifarou Timoteo enaʼö böi iböhöli wangaʼi halöwö khö Lowalangi ”enaʼö oroma waʼatedou mö ba khöra fefu”. (I Timoteo 4:13-15) Hewaʼae no ara ita wangai halöwö khö Lowalangi, moguna tadouʼö waʼatua-tuada ba wanuriaigö.
2. Hewisa enaʼö tola tahalö khöda wamahaʼö moroi khö ndra talifusöda?
2 Tola Tahalö Khöda Wamahaʼö Moroi khö ndra Talifusöda: Enaʼö tedou ita ba wanuriaigö, moguna tafahaʼö ita khö ndra talifusöda. (Gamaedola 27:17) Na möi ita manuriaigö ba niha, ba ginötö fahuhuo dalifusöda ba zokhö omo moguna tafondro-ndrongo. Tola öʼandrö mbua wangera-ngera dalifusöda si no toʼölö ba wanuriaigö, ba öhaogö wamondro-ndrongo. (Gamaedola 1:5) Hadia so khöu waʼataʼu ba ginötö ö fuli öʼondrasi niha si no irai falukha khöu ba wanuriaigö, ba baginötö öfahaʼö ira ba Daromali mazui halöwö tanö böʼönia sanandrösa ba wanuriaigö? Tandraigö andrö khö dalifusöda satua sokubaloi mazui khö dalifusöda si no toʼölö ba wanuriaigö enaʼö ibeʼe khöu wamahaʼö. Törö tödöu wa eheha Yehowa zi tola manolo yaʼugö ba wanuriaigö, andrö böi mamalö-malö ölau mangandrö.—Luka 11:13.
3. Hewisa na so ndra talifusöda zameʼe khöu fanuturu lala ba wanuriaigö hewaʼae lö niʼandröu mbua wangera-ngerara?
3 Böi abao dödöu na so ndra talifusöda zameʼe khöu bua gera-era ba wanuturu lala enaʼö atua-tua ndraʼugö ba wanuriaigö, hewaʼae lö niʼandröu. (Zangombakha 7:9) Simane Afolo, taʼandrö saohagölö mene-mene si no labeʼe khöda ba tatemaʼö ia si fao fangide-ngideʼö. Daʼa lala sabölö sökhi.—Gamaedola 12:15.
4. Moloʼö Yesu, hana wa moguna tedou waʼatua-tuada ba wanuriaigö?
4 Faʼatua-tuada si no Taʼokhögö Enaʼö Daʼö zi Tobali Famolakhömi Lowalangi: Iʼogunaʼö gamaedola Yesu ba wamahaʼö ndra nifahaʼönia enaʼö itugu monönö waʼatua-tuara, enaʼö böi laböhöli wangaʼi halöwö khö Lowalangi. Iʼamaedolagö ia hulö döla nagu ba sawuyu si lö faröi iʼamaedolagö ndraha geu. Imane, Ama zangehaogö ndraha enaʼö mowua ba ”enaʼö tedou waʼoya mbuania”. (Yohane 15:2) Simane zokhö kabu nagu omasi ia na sinanönia itugu tedou ba monönö mbuania, simanö göi Yehowa enaʼö tedou ita ba wanuriaigö yaʼia daʼö ”mbua-bua mbewe sangombakha töinia”. (Heberaiʼo 13:15) Hadia mbua nitemada na lö taböhöli wanuriaigö? Itema li Yesu, ”Ba daʼö tefosumange namagu, enaʼö oya mbuami.”—Yohane 15:8.