Ba Mbaŵa Wanörö Tödö Faʼamate Yesu, Oʼö Waʼowölöʼölö Yehowa ba Yesu
1. Hadia nifalua ndra Samaduhuʼö Yehowa ba mbaŵa fanörö tödö faʼamate Yesu?
1 Omasi sibai Yehowa ba wamalua ohitö dödönia. Ba ginötö tafatunö howu-howu sanandrösa ba Mbanua Lowalangi, Yesaya 9:7 imane, ”Faʼaukhu dödö Yehowa ngahönö zamalua si manö.” Simanö göi me so Yesu ba gulidanö, omasi ifalua gohitö dödö Namania. (Yohane 2:13-17; 4:34) Ero röfi, ba mbaŵa wanörö tödö faʼamate Yesu, ngahönö ndra Samaduhuʼö Yehowa ba zi sagörö ulidanö, lafalua gohitö dödö Yehowa ba Yesu, ba ladouʼö ginötöra ba wanuriaigö. Hadia omasi ndraʼugö öfalua daʼö?
2. Börö meʼowölöʼölö ita ba wanuriaigö hadia nifaluada ba ginötö 7 mbaŵa si tölu?
2 Fogaoni ba Ginötö Wanörö Tödö Faʼamate Yesu: ba ndröfi andre, tabörögö wameʼe undanga ba niha ba ngaluo hari satu, 7 mbaŵa si tölu. Tola öʼera-era iʼotarai iadaʼa enaʼö fao ndraʼugö ba wangai halöwö wanuriaigö. Tatu manö terou dödö mbanua niha keriso ba omasi ira laʼombakhaʼö ba niha fefu sanandrösa ba waʼamate Yesu. Odödögö wameʼe khöra sura undanga ba niha nifahaʼöu moroi ba Zura Niʼamoniʼö, awöu wohalöwö, si fahatö khöu, awöu ba zekola, mazui öʼogunaʼö jw.org.
3. Hewisa enaʼö tola tadouʼö ita ba wanuriaigö ba mbaŵa si tölu ba mbaŵa si öfa?
3 Tobali Perintis Ekstra: Faʼowölöʼölö zamarou tödöda ba wondrouʼö inötöda ba wanuriaigö. Ato ndra talifusöda ba mbaŵa si Tölu ba si Öfa andre sangaʼi perintis ekstra, börö me tola lafili ginötö si 30 za ba zi sara waŵa. Ba ginötö mbongi wamahaʼö ba nomo mazui ba ginötö öfahaʼö ndraʼugö samösa, tola öʼangeraigö hadia zi tola öfalua. (Gamaedola 15:22) Tola tefarou dödö ndra talifusöda tanö böʼö na laʼila owölöʼölö ita ba wanuriaigö. Na no ötatugöi enaʼö oya ginötö niʼogunaʼöu ba wanuriaigö, no öʼoʼö waʼowölöʼölö Yesu.—Mareko 6:31-34.
4. Hadia howu-howu nitemada na taʼoʼö waʼowölöʼölö Yehowa ba Yesu?
4 Oya howu-howu nitemada na taʼoʼö wa owölöʼölö Yehowa ba Yesu. Ato niha so tema duria somusö dödö ni faʼemada. Tatu manö tasöndra wa ohahau dödö börö me no tafalua zomasi Yehowa ba wanolo niha fefu. (Halöwö Zinenge 20:35) Sabölö sökhi, taʼomusoiʼö dödö Yehowa ba Yesu ba halöwö si no tafalua.