Famahaʼö Salio Muʼila Eluaha
1. Hadia zi lö tola löʼö tafalua ba ginötö tafahaʼö niha?
1 Moguna wamahaʼö salio muʼila eluaha enaʼö aboto ba dödö niha nifahaʼöda. Na taʼoʼö wamahaʼö nifalua Yesu, daʼö zi tobali fanolo khöda ba wondrouʼö ”famahaʼö.”—II Timoteo 4:2; Yohane 13:13.
2. Hadia geluaha wamahaʼö salio muʼila eluaha?
2 Ogunaʼö Wehede Salio Muʼila Eluaha: Me mamahaʼö Yesu ba hili, iʼogunaʼö wehede salio muʼila eluaha. (Mataiʼo 5-7) Me larongo wehede Yesu, ”Ba tobali dödö zato ba wamahaʼönia.” Niha nifatenge ba woraʼu Yesu, lamane wangumaʼö ”lö irai simanö niha wehede, simane fehede niha daʼö.” (Mataiʼö 7:28, 29; Yohane 7:46) Lö moguna taʼogunaʼö ngawua wehede si lö muʼila eluaha, mazui gamaedola sabua enaʼö faduhu dödö niha ba nifatunöda. Na tafahaʼö niha, moguna taʼogunaʼö ngawua wehede sasese larongo.
3, 4. Hadia zi tebai tafalua ba ginötö tafahaʼö niha?
3 Tatugöi Hawaʼoya: Iʼila Yesu hawaʼoya wamahaʼö sinangea ibeʼe ba niha nifalukhasinia. (Yohane 16:12) Simanö göi ita, moguna taʼoʼö nifalua Yesu. Mendrua manö na fahuhuo ita ba zi fahuwu khöda, ba zomasi mamahaʼö yaʼia ba Zura Niʼamoniʼö hegöi iraono. Moguna taʼangenanöi enaʼö böi oya duho wamahaʼö nifaʼemada, irege atage ira hewaʼae ba wamaigida omasi sibai ira wamondro-ndrongo. Niha somasi mamahaʼö yaʼira ba Zura Niʼamoniʼö, lö aetu-aetu laʼalui zi duhu sanandrösa khö Yehowa.—Yohane 17:3; I Korindro 3:6.
4 Böi Mangoloi Dödöda ba Duho Siʼoföna: Lö abua wamahaʼö Yesu ba lö izara-zara wanutunö. Me imane, ”Dozi si so ba lewatö, ba möi ira yawa.” Tenga daʼö ginötö si tefaudu khönia ba wamotokhi hadia zalua ba niha nisusugi. (Yohane 5:28, 29) Na tafahaʼö niha ba Zura Niʼamoniʼö, böi mangoloi dödöda ba duho siʼoföna ba tataha dödöda enaʼö böi tafatunö duho tanö böʼö.