FAʼAURI NIHA KERISO
Itolo Ita Yehowa ba Wanaögö Abula Dödö
Sagötö ba ngaluo safuria andre, oya gabula dödö salua khöda. Itaria tarasoi wa abua sibai gabula dödö nitaögöda. Hizaʼi, na lö tebulö tahatöʼö ita khö Yehowa, hasambalö itolo ita ba wanaögö abula dödö sabölö ebua. (Yes 43:2, 4) Hewisa enaʼö tola ahatö ita khö Yehowa ba ginötö alua khöda gabula dödö?
Mangandrö. Na tatouʼö nösi dödöda khö Yehowa, hasambalö ibeʼe khöda waʼahono dödö hegöi faʼabölö enaʼö so khöda waʼanau gölö.—Fil 4:6, 7; 1Te 5:17.
Möi ba gangowuloa. Iadaʼa, itugu moguna khöda gö wamati hegöi fariawösa si no ihenaigö Yehowa ba gangowuloa, töra moroi ba zilalö. (Heb 10:24, 25) Ba ginötö tafaʼanö ita, taʼondrasi gangowuloa, ba tabeʼe mbua gera-erada, tola tatema wanolo moroi ba geheha Yehowa.—Fam 2:29.
Manuriaigö. Aoha khöda wangosambuaʼö fangera-erada ba ngawalö zi sökhi na lö taböhöli weʼamöi manuriaigö ndrohu-ndrohu zi sagu khöda. Itugu teʼaroʼö göi wahuwusada khö Yehowa hegöi khö ndra talifusöda.—1Ko 3:5-10.
FAIGI VIDEO YEHOWA ZOLOHE YAʼUGÖ, BA BEʼE WANEMA LI BA WANOFU-NOFU DAʼA:
Hadia zanolo Malu irege lö tebulö ahatö ia khö Yehowa sagötö alua khönia gabula dödö?
Simane Malu, hewisa wa tola möi fondrara dödöda Zinunö 34:18 ba ginötö alua khöda abula dödö?
Moroi ba duma-duma Malu andre, hadia zangoromaʼö wa ibeʼe khöda Yehowa ”waʼabölö sahöli-höli dödö” ba ginötö alua gabula dödö?—2Ko 4:7