Hadia Zindruhunia Zotatugöi Faʼauriu ba zi So Miföna?
Ato zi faduhu tödö wa so waʼabölö si lö oroma sotatugöi faʼaurira ba zi so miföna. Daʼö mbörö wa lafalua ngawalö zi toʼölö mufalua enaʼö moharazaki ira mazui itugu sökhi waʼaurira.
NIFADUHUSI TÖDÖ NIHA SATO
FANAHÖ DÖFI: So zi faduhu tödö wa so zotatugöi faʼaurira ba zi so miföna yaʼia daʼö hezo so gametahö ndröfi me tumbu ira. Börö daʼö, enaʼö laʼila hadia zalua khöra ba zi so miföna ba hewisa enaʼö lö teʼala waʼaurira, labaso ramalan zodiak.
FENG SHUI: So zi faduhu tödö enaʼö mofozu waʼaurira ba zi so miföna moguna latatugöi enaʼö tefaudu fefu gama-gama si so ba zi fasuira ba waʼabölö mbanua si yawa awö danö. Imane Lo Wing,a si toröi ba Hong Kong, ”Enaʼö ato zowöli ba tokogu, iʼombakhaʼö khögu niha sonekhe ba feng shui enaʼö ubeʼe batu kristal ba nahia si no mutatugöi.”
FAMOSUMANGE NDRA SATUA SI NO MATE: So zi faduhu tödö wa moguna laʼomusoiʼö dödö ndra satuara si no mate mazui ngawalö niʼolowalangigö enaʼö telumöʼö ba tefahowuʼö ira. Imane Van si toröi ba Vietnam, ”Faduhu dödögu ba zilalö wa itugu sökhi waʼaurigu na ubeʼe zumange khö ndra satuagu si no mate. Daʼö zinangea ufalua hegöi iraonogu enaʼö ohahau dödöma ba zi so miföna.”
REINKARNASI: Ato zi faduhu tödö na mate zi samösa niha, hasambalö ifuli tumbu ia ba mboto tanö böʼö. Ba simane daʼö manö zalua irugi zi lö aetu. Faduhu göi dödöra wa fefu hadia ia zalua khöra iadaʼa, alua daʼö börö nifaluara ba waʼaurira ba zilalö.
Sindruhu sa, ato zambö faduhu tödö ba daʼö. Hewaʼae simanö, lö tebulö laʼalui hadia zalua ba zi so miföna, laʼogunaʼö zuʼa danga, zodiak, papan Ouija®, kartu tarot, shio, ba tanö böʼönia. Lawaʼö tödöra wa tola laʼila hadia zalua ba zi so miföna na laʼogunaʼö daʼö.
HADIA MOFOZU NIFALUARA ANDRÖ?
Me no lafalua fefu daʼö, hadia itugu sökhi waʼaurira ba lasöndra waʼohahau dödö ba zi so miföna?
Nehegö atö zi no irai alua khö Hào, si toröi ba Vietnam. Ba zilalö, ifaduhusi tödö wanahö döfi, feng shui, ba ifosumange ndra satuania si no mate. Hizaʼi, hadia mofozu waʼaurinia me no ifalua daʼö? Imane Hào, ”Rugi ndraʼo ba halöwögu, ebua gömögu, alua gabula dödö ba nösi nomogu ba fawuka sibai gera-eragu.”
Qiuming, moroi ba Taiwan, ifaduhusi tödö göi wanahö döfi, reinkarnasi, feng shui, hegöi famosumange ndra satua si no mate ba faduhu göi dödönia wa no itatugöi zalua ba waʼaurida Lowalangi. Hizaʼi me no ihaogö ifareso fefu daʼö, imane wanutunö, ”Aboto ba dödögu wa fefu wamahaʼö hegöi si toʼölö mufalua andrö möi fangalangu dödö niha ba no fabörö-börö. Sasesenia, lö itörö nifaʼeleʼö niha sanahö döfi. Baero daʼö sanandrösa ba reinkarnasi, na lö uʼila hewisa waʼaurigu ba zilalö, hewisa wa tola ubulöʼö gamuata hegöi faʼaurigu iadaʼa?”
”Aboto ba dödögu wa fefu wamahaʼö hegöi si toʼölö mufalua andrö möi fangalangu dödö niha ba no fabörö-börö.”—QIUMING, TAIWAN
Simane saboto ba dödö Hào, Qiuming, ba ato niha tanö böʼö, lö nitatugöi Lowalangi, döfi, satuada si no mate, mazui reinkarnasi hewisa waʼaurida dania ba zi so miföna. Na simanö, hadia zotatugöi salua ba waʼaurida ba zi so miföna?
Ato niha sorasoi wa hasambalö sökhi zalua ba waʼaurira ba zi so miföna na alawa zekolara ba ebua gefera. Hizaʼi, hadia sindruhu-ndruhu daʼö zameʼe khöra faʼohahau dödö ba zi so miföna?
a So ösa zi no mufaböʼöni töi ba majalah daʼa.
b Tehalö wehede daʼö moroi ba Mbuku Niʼamoniʼö ba Galatia 6:7.