LALA BA WOLAWA FATIUSA

2 | Böi Sulöni zi Lö Sökhi Awönia si Lö Sökhi

Famahaʼö Zura Niʼamoniʼö:

”Böi misulöni zi lö sökhi awönia si lö sökhi. . . . Na tola, migohi waʼatulö ba niha fefu. Böi milau mbalömi . . . börö me so ba zura, ’”Khögu wolau balö, yaʼo zanulöni,” iwaʼö Yehowa.’”—ROMA 12:17-19.

Eluahania:

Hewaʼae no sinangea mofönu ita na lafalua khöda zi lö sökhi, lö fao dödö Lowalangi na talau mbalöda. Hizaʼi, iʼandrö khöda enaʼö tabaloi ia börö me lö ara tö iheta fefu walöʼatulö salua ba gulidanö andre.—Sinunö 37:7, 10.

Si Tola Öfalua:

Na lalau mbalöra niha, no fao ira ba wangaʼasogö fatiusa. Börö daʼö, böi lau mbalöu na so zangafökhöiʼö tödöu mazui samalua khöu si lö sökhi. Tandraigö haogö wameʼe fanema li ba taha dödöu. Itaria, abölö ohahau dödöu na öʼolifugö manö zalua andrö. (Amaedola 19:11) Hizaʼi na moguna, tola manö abölö sökhi na öfatunö zalua andrö. Duma-dumania, na so niha samalua khöu si lö sökhi, tola öhalö gangetula ba wamatunö khö ndra folisi mazui khö ndra samatörö.

Yaʼita samösa zi rugi na talau mbalöda

Hewisa na lö hadöi lala ba wangasiwai salua andrö si fao faʼatulö? Mazui, hewisa na no öforege wangalui lala ba wangasiwai salua andrö si fao faʼatulö? Böi sulöni zi lö sökhi awönia si lö sökhi. Tola manö itugu lö sökhi zalua na ölau mbalöu. Hizaʼi, forege ba wangeheta fatiusa. Fahaʼö ndraʼugö ba wamaduhusi tödö mene-mene Lowalangi ba faigi hewisa lalania wanolo yaʼugö ba wangasiwai salua andrö. Imane Sura Niʼamoniʼö, ”Odaligö ia ba yaʼia zamaigi lala khöu.”—Sinunö 37:3-5.

Si No Irai Alua—ADRIÁN

Lö Saʼae Ilau Mbalönia

Me awuyu-wuyu nasa Adrián, tobali ia ono matua safönu fatiusa, si faʼudu-udu, ba somasi molau balö ba niha samalua khönia si lö sökhi. Imane, ”Asese fao ndraʼo fafana, ba asese mendro ndraʼo ba laröi manö ndraʼo ba zinga lala.”

Ibörögö ifahaʼö ia ba Zura Niʼamoniʼö Adrián me 16 fakhe ndröfinia. Imane, ”Börö me itugu tedou wamahaʼögu yaʼo ba Zura Niʼamoniʼö, aboto ba dödögu wa moguna ubulöʼö waʼaurigu.” Lö tola löʼö iheta khönia watiusa ba iböhöli waʼalösökhi. Möi fanolonia nisura ba Roma 12:17-19, samarou yaʼia enaʼö lö isulöni zi lö sökhi awönia si lö sökhi. Imane, ”Fao dödögu, Yehowa zanulöni. Udaʼi-daʼi ba wondröi fefu zi lö sökhi si no irai ufalua.”

Samuza inötö me bongi, tohare geng tanö böʼö si no irai tobali udu Adrián ba wamöbözi yaʼia. Imane kafalo geng daʼö, ”Aine, talau fabago!” Imane Adrián, ”So ba dödögu wanulöni.” Hizaʼi, moroi na ilau mbalönia, mangandrö ia khö Yehowa ba iröi nahia daʼö.

Imane nasa Adrián, ”Mahemolunia, ifuli falukha ndraʼaga kafalo geng daʼö ba zi ha yaʼia. Tokea sibai ndraʼo me iʼondrasido ba imane, ’Bologö dödöu ba zalua menewi. Omasido na tobalido simane yaʼugö. Omasido ufahaʼö ndraʼo ba Zura Niʼamoniʼö.’ Omuso sibai dödögu me tola utaha wönugu! Daʼö mbörö wa ibörögö ifahaʼö ia.”