Na öʼoʼö li zatua, hulö zamuʼa foʼömö ndraʼugö ba bank. Itugu lafaduhusi tödö ndraʼugö na laʼila wa no öfalua zi tobali noro dödöu
KHÖ ZI BOHOU EBUA
10 Tola Mufaduhusi Tödö
HADIA GELUAHANIA
Na tola mufaduhusi tödö ndraʼugö, abeʼe dödö ndra satuamö, ira awömö, hegöi kafalomö wohalöwö. Niha nifaduhusi tödö, hasambalö iʼoʼö zi no mufakhoi, ifalua zi no mufabuʼu, ba lö tebulö itörö zindruhu.
HANA WA MOGUNA DAʼÖ
Si toʼölönia, na itugu ifaduhusi tödö ndraʼugö si samösa niha, itugu oya nitehegönia khöu ba wangai angetula samösa.
”Na omasiʼö lafaduhusi tödö ndraʼugö ira satuamö, foromaʼö wa tola öhalö gangetula samösa ba tola öfalua noro dödö si no labeʼe khöu hewaʼae na lö yaʼira ba nomo. Daʼö lala sabölö sökhi.”—Sarahi.
NIWAʼÖ ZURA NIʼAMONIʼÖ: ”Mitatugöi hewisa zindruhunia ami.”—2 Korindro 13:5.
SI TOLA ÖFALUA
Na omasiʼö abölö lafaduhusi tödö ndraʼugö niha böʼö, mazui enaʼö lafuli lafaduhusi tödö ndraʼugö, tandraigö falua daʼa.
Böi falimo. Na falimo ndraʼugö, lö saʼae faduhu dödö niha böʼö khöu. Hizaʼi na lö falimo ndraʼugö ba lö khöu famini tödö, mendrua manö na öfaduhuʼö wa no fasala ndraʼugö, hasambalö faduhu dödöra khöu.
”Na sökhi manö zalua, aoha khöda wanörö sindruhu. Sabuania yaʼia daʼö ba ginötö öfaduhuʼö zala si no öfalua. Hizaʼi na öfalua daʼö, itugu faduhu dödö niha khöu.”—Caiman.
NIWAʼÖ ZURA NIʼAMONIʼÖ: ”Omasiga matörö zindruhu ba ngawalö hadia ia.”—Heberaiʼo 13:18.
Tola muʼodaligö. Ba zi sambua survei ba Amerika, 78 persen zohalöwö ba personalia sangumaʼö wa ”so tölu gamuata si tohude niʼalui perusahaan ba ginötö lafili zohalöwö. Moroi ba zi tölu ngawalö andrö yaʼia daʼö si tola muʼodaligö”. Na iʼotarai iadaʼa öforomaʼö wa niha si tola muʼodaligö ndraʼugö, tatu ötema mbuania ba zi so miföna.
”Na ufalua ba wangonorogö tödö halöwögu yomo ba nomo hewaʼae lö laʼoʼou ndraʼo, hasambalö lanehe-nehegö ira satuagu. Na asese ufalua zimane daʼö, itugu lafaduhusi tödö ndraʼo.”—Sarah.
NIWAʼÖ ZURA NIʼAMONIʼÖ: ”Uʼila wa abölö oya dania nifaluamö moroi ba niwaʼögu.”—Filemo 21.
Faʼebolo dödö. Faʼatedou mboto zi bohou ebua simane faʼalawa hegöi faʼesolo, tola laʼanemaiʼö laʼila niha. Hizaʼi, faʼatedoura ba wangera-ngera hegöi ba waʼatua-tua, lö iʼanemaiʼö oroma ba niha.
”Moguna wamorege hegöi inötö enaʼö faduhu dödö zatuada hegöi niha böʼö khöda. Lö tobönö na ha sakali taforomaʼö gamuata si sökhi andrö.”—Brandon.
NIWAʼÖ ZURA NIʼAMONIʼÖ: ’Mifalua waʼebolo dödö.’—Kolose 3:12.