Faʼafökhö Nirasoida Na Mate Niha Niʼomasiʼöda

”No töra 39 fakhe me no mangowalu ndraʼaga Sophia.a Ba gafuriata, mate ia börö wökhö si no itaögö ba zi hauga fakhe. Labeʼe khögu wondrara dödö ira awögu, ba uforege enaʼö oya halöwögu. Hizaʼi barö zi döfi, hulö nihökha-hökha bakha dödögu. Tebulö-bulö manö nirasoigu. No saʼae tölu fakhe me no mate Sophia. Hizaʼi, itaria abu dödögu ba zi lö udöna-döna.”—Kostas.

Hadia so niha niʼomasiʼöu si no mate? Na so, tatu öʼila ötöfaigö ba dödöu zalua khö Kostas. Te örasoi wa lö hadöi abula dödö fondrege zafökhö baero na mate woʼomoda, ösi nomoda, mazui si fahuwu khöda. Fao göi dödö ndra ilmuwan ba daʼö me no lafareso hadia zalua ba niha si göna abula dödö. Imane sambua artikel si so ba The American Journal of Psychiatry, ”Faʼamate niha niʼomasiʼöda tola iʼasogö khöda waʼabu dödö sandrohu faʼauri, ba tawaʼö wa lö eluaha waʼaurida.” Na alua khöda zimane daʼö, tola manö manofu-nofu ita, ’Hawaʼara taya gabula dödögu andre? Hadia tola zui usöndra waʼomuso dödö? Hadia zi tola mameʼe khögu fondrara dödö?’

Ba majalah daʼa, tatutunö wanema li moroi ba wanofu-nofu andrö. Ba artikel aefa daʼa, ifatunö khöda hadia manö nirasoi niha na mate niha niʼomasiʼöra. Artikel tanö böʼö ifatunö khöda hadia manö zi tola manolo yaʼita ba wanaögö abula dödö andrö.

Matötöna wa möi fondrara dödö ba fanolo niha majalah daʼa ba ginötö larasoi waʼafökhö börö me no mate niha niʼomasiʼöra.