Hadia Lua-Luania Teknologi ba Zi Fahuwu khömö?
Börö teknologi, aoha sibai khöda fahuhuo khö ndra awöda hewaʼae ba nahia saröu toröi ira. Tola tasofu duriara ba SMS, e-mail, video call hegöi ba media sosial. Hizaʼi, na ha daʼö manö niʼogunaʼöda ba wahuhuosa khö ndra awöda, si toʼölönia . . .
lö taʼila tatöfaigö ba dödöda zalua khöra.
aröu-röu ba dödöra ba hulö zi lö eluaha waʼaurira.
ha tana khönia iʼalui ba lö iʼangeragö niha böʼö.
SINANGEA ÖFALUA
TATÖFAIGÖ BA DÖDÖDA ZALUA KHÖ NAWÖDA
Enaʼö taʼila tatöfaigö ba dödöda zalua ba niha böʼö, moguna tabeʼe ginötöda ba woʼangeragö niha daʼö. Hizaʼi, te abua khöda wamalua daʼö na oya sibai notifikasi moroi ba media sosial sofeta ba HP-da. Hadia mbörö?
Börö me oya sibai pesan sofeta khöda, tola manö lö fakhamö taʼila hezo pesan moroi khö ndra awö-awöda. Si toʼölönia ha asala tabaso fefu pesan sofeta khöda. Lua-luania, lö taʼila wa so nawöda sangandrö fanolo.
ANGERAGÖ: Ba ginötö ö-kirim pesan khö ndra awömö, hewisa wangoromaʼöu wa öʼameʼegö tödö zalua khönia?—1 FETERO 3:8.
HULÖ ZI LÖ ELUAHA WAʼAURI
Moloʼö sambua penelitian, ato zi lö faʼomuso dödö me no aefa lafaigi media sosial. Börö me lafaigi-faigi ngawalö gambara si so ba media sosial, tola manö iwaʼö tödönia si samösa niha wa ”lö eluaha waʼaurinia”.
Baero daʼö, hadia ni-posting ba media sosial hulö tawaʼö wa faʼomuso-muso dödö manö zalua ba waʼauri niha böʼö. Lua-luania, na asese tafaigi-faigi media sosial, tola manö tafaedo-faedogö ita ba niha böʼö ba hulö aföli ita waʼaurida.
ANGERAGÖ: Ba ginötö öʼogunaʼö media sosial, hewisa enaʼö lö öfaedo-faedogö ndraʼugö ba niha böʼö?—GALATIA 6:4.
AMUATA FAKHÖGUSA
Samösa guru samaigi-maigi ira nifahaʼönia ba so ösa niʼilania ha ba daʼö fariawö ira ba niha samohare yaʼira.a Börö daʼö, so zoʼamaedolagö awönia andrö simane aplikasi si tola muʼogunaʼö ba ginötönia ba laduhö na lo moguna khöra.
ANGERAGÖ: Hadia zi no ö-posting daʼö zangoromaʼö wa lö omasiʼö kala mazui ha yaʼugö niʼera-eramö.—GALATIA 5:26.
SI TOLA ÖFALUA
FARESO HEWISA WANGOGUNAʼÖMÖ TEKNOLOGI
Na sökhi wangogunaʼömö teknologi, möi fanolo khöu ba tola fahuhuo ndraʼugö khö ndra awöu ba itugu aro wahuwusami.
GOI-GOI ZURA NIʼAMONIʼÖ: ”Faʼomasi . . . lö iʼalui dana khönia.”—1 KORINDRO 13:4, 5.
Tandroi hadia manö wanuturu lala sinangea öʼoʼö mazui sura hadia manö danö böʼö sinangea öfalua.
Hadia asese fahuhuo ndraʼugö khönia mazui öfaʼoheʼö manö SMS mazui e-mail?
Na fahuhuo ndraʼugö, böi hatöʼö ba zingau HP-mö mazui öbunu nada dering
Alösi ginötöu wamaigi-maigi media sosial
Yatobali ndraʼugö samondrondrongo si sökhi
Telefo nawömö si so abula dödö
a Tehalö gangombakhata daʼa ba mbuku Reclaiming Conversation.