NIFALUADA NA TEDOU MBÖLI ZOGUNA
Yaʼatua-tua Ndraʼugö ba Wangogunaʼö Kefe
Faʼatedou mböli zoguna, oya iʼasogö gabula dödö. Tenga daʼö geluahania wa lö hadöi khöda fanolo. Hizaʼi, te so nasa zinangea öfalua ba wanaögö daʼö.
HANA WA MOGUNA
Na lö atua-tua ndraʼugö ba wangogunaʼö kefe, tola so khöu waʼaombö dödö hegöi faʼafawuka wangera-ngera. Hewaʼae lö ebua gefe niʼokhögömö, so nasa zi tola öfalua enaʼö atua-tua ndraʼugö ba wangogunaʼö kefe.
SI TOLA ÖFALUA
Böi ebua wangogunaʼöu kefe moroi ba nisöndramö. Na öfalua daʼa, tola ösöndra waʼahono dödö, ba no tefaʼanö ndraʼugö na so gefe niʼogunaʼöu ba zi lö mudöna-döna.
Tola möi fanolo khöu na öhaogö öʼangeragö hadia niʼölimö moloʼö si sagu khöu. Ösura hadia manö zinangea öʼöli. Tola sökhi wangogunaʼöu kefe irege lö abölö ebua gefe niʼogunaʼöu moroi ba nisöndramö. Haogö tatugöi hadia manö gama-gama sinangea öʼöli. Aefa daʼö, oʼö hadia zi no ösura ba faudugö daʼö ba zinöndramö mazui tebulö mböli zoguna. Na no mangowalu ndraʼugö, faogö ngambatöu ba wangai angetula.
Tandraigö falua daʼa: Abölö sökhi na öʼöli gama-gama ba öʼanemaiʼö wameʼe kefe moroi na özara-zara wamuʼa yaʼia. So ösa zangumaʼö na lafalua zimane daʼö tola tefaudu wangogunaʼöra kefe ba lö moʼömö ira. Beʼe ginötömö ba wamareso buku rekeningmö, hauga gefe niʼiröʼömö ba hauga niʼogunaʼömö ba zi sara waŵa. Na no öʼila hauga gefe niʼokhögömö, lö fawuka sibai wangera-ngeramö.
Sindruhu sa, abua khöda ba woʼöna-önaiʼö wangogunaʼö kefe. Hizaʼi na tahaogö taʼangeragö hadia niʼölida, tola möi fanolo khöda. Buania, lö khöu faʼaombö dödö sanandrösa ba gefe.
Yaʼahono dödöu ba zi no ösöndra. Yatobali ndraʼugö sohalöwö si sökhi. Hadia manö zinangea öfalua enaʼö tobali ndraʼugö sohalöwö si sökhi? Duma-dumania, ohalöwö ba ginötö si no mutatugöi. Haogö gamuatamö ba nahia wohalöwö, foromaʼö wa yaʼugö andrö somasi manolo, samosumange niha böʼö ba sowölö-ölö ba wamalua halöwö. Baero daʼö, oʼö gamakhoita si no mufakhoi ba forege enaʼö tedou ndraʼugö ba wamalua halöwö andrö.
Böi ogunaʼö gefeu ba zi lö karua. Sofu khöu samösa, ’Hadia oya uhorigö gefe ba wowöli gama-gama sambö moguna khögu mazui si tola mamaʼala faʼaurigu?’ Duma-dumania, so ösa niha sangohorigö kefera ba wowöli narkoba, tuo, roko mazui lalau famai. Nifaluara andre tola göna ira fökhö ba aheta ira ba halöwöra.
Iröʼö gefemö ma so zalua si lö mudöna-döna. Na tola, iröʼö yawa maʼifu gefemö ma dania so zalua si lö mudöna-döna. Kefe simane daʼö, tola öʼogunaʼö ba ginötö so nösi nomomö sofökhö, aheta ndraʼugö ba nahia wohalöwö mazui so gabula dödö salua si lö mudöna-döna.