Honogö Dödöu ba zi No So

HANA WA MOGUNA

Imane samösa psikolog sotöi Jessica Koehler, wa niha sahono tödö ba zi no so, asese iʼokhögö wangera-ngera si sökhi sanandrösa ba waʼauri. Baero daʼö lö göi afökhö dödöra ba niha böʼö. Andrö, lö ahöli dödöda na abölö owua-wua dödöra ba lö fawuka wangera-ngerara. Sindruhunia, so ösa niha sanöndra faʼomuso dödö hewaʼae lö ebua gokhötania. Manandrösa daʼa ba niha soʼameʼegö tödö ngawalö hadia ia si tebai muʼöli faoma kefe, simane faʼomuso dödö me oya labeʼe ginötöra wefao ba nösi nomora hegöi si fahuwu khöra.

SI TOLA ÖFALUA

Böi faedo-faedogö ndraʼugö ba niha böʼö. Na öfaedo-faedogö waʼaurimö ba niha si kayo tola manö lö hadöi khöu faʼahono dödö ba zi no so ba so khöu waʼafökhö dödö. Baero daʼö, tola manö hadia niʼilada andrö tenga sindruhu-ndruhu itörö. So ösa niha sangokhögö gama-gama sebua böli sindruhunia no ifali ira foʼömö. Imane Nicole si toröi ba Senegal, ”Tenga dali oya gokhötagu awena omuso dödögu. Na ahono dödögu ba zi no so, omuso dödögu hewaʼae oya niʼokhögö niha böʼö moroi khögu.”

Tandraigö falua daʼa: Timbagö iklan mazui media sosial sangoromaʼö faʼakayo hegöi faʼatohude waʼauri niha böʼö.

Andrö saohagölö. Niha sasese mangandrö saohagölö ahono dödönia ba zi no so, lö imane tödönia wa moguna mazui sinangea itema zabölö oya moroi ba zi sagu khönia. Imane Roberton moroi ba Haiti, ”Ubeʼe ginötögu woʼangeragö si sökhi nifalua niha böʼö khögu hegöi ba nösi nomogu. Aefa daʼö, uʼandrö khöra saohagölö ba zi no lafalua. Ufahaʼö göi nonogu matua si walu fakhe ba wangandrö saohagölö na so zamuala khönia.”

Tandraigö falua daʼa: Ero maʼökhö sura hadia manö niʼandrömö ”saohagölö”. Tola öʼandrö saohagölö börö me lö mofökhö ndraʼugö, öʼokhögö nösi nomo safönu faʼomasi, sindruhu si fahuwu, hegöi me öʼila pemandangan si sökhi.

Itaria, moguna khöda wamorege enaʼö ahono dödöda ba zi no so. Hizaʼi, famorege nifaluada tenga zaya-zaya gölö! Na ahono dödöda ba zi no so, tola omuso dödöda börö me faʼomuso dödö andrö tebai muʼöli faoma kefe.