NIFALUADA NA TEDOU MBÖLI ZOGUNA
Böi Tebulö Foromaʼö Waʼoböwö
Na abua khöu ba wombönökhi soguna khömö, tola manö abua khöu ba wangoromaʼö faʼoböwö ba niha böʼö. Hizaʼi, sindruhunia tola öforomaʼö waʼoböwö ba öʼöna-önaiʼö wangogunaʼö kefe. Faʼoböwö tola möi fanolo khöu ba wanaögö faʼabasaki ba wangalui soguna.
HANA WA MOGUNA
Tola tasöndra waʼomuso dödö ba faʼahono dödö na omasi ita mamuala hewaʼae ha maʼifu daʼö. Lafaduhuʼö ira peneliti wa niha sangoromaʼö faʼoböwö lö alio göna ira fökhö ba laʼokhögö wangera-ngera si sökhi. Duma-dumania, tola alö waʼaombö dödö hegöi faʼafawuka wangera-ngera, lö darah tinggi, ahono dödö wemörö ba tola göi iʼalösi wökhö tanö böʼö.
Na omasi ita mamuala ba niha böʼö simane kefe mazui tanö böʼönia, lö abua khöda ba wanemaʼö fanolo ba ginötö moguna khöda. Imane Howard si toröi ba Inggris, ”Yaʼo hegöi foʼomogu ira alawe, maʼalui lala ba wangoromaʼö faʼoböwö hegöi ba wanolo niha böʼö. Börö daʼö, ba ginötö matema wanolo ba niha böʼö, lö moʼömö sibai dödöma.” Sindruhu sa, niha sangoromaʼö faʼoböwö soroi ba dödö, lö itötöna zulö. Hewaʼae simanö, tola laʼokhögö zindruhu si fahuwu somasi manolo yaʼira ba ginötö moguna.
SI TOLA ÖFALUA
Amuala ba niha böʼö moloʼö si sagu khömö. Hewaʼae lö ebua gefemö, tola mamuala ndraʼugö ba niha böʼö hewaʼae no öna-öna. Daʼö nifalua Duncan hegöi ösi nomonia si toröi ba Uganda. Hewaʼae moʼamböta ira, hizaʼi lö tebulö laforomaʼö waʼoböwö. Imane Duncan, ”Ero hari Migu, yaʼo hegöi foʼomogu makaoni zi fahuwu khöma wemanga ba nomo hewaʼae no öna-öna daʼö. Omuso sibai dödöma me fariawö ndraʼaga.”
Ba ginötö mamuala ita ba niha böʼö, moguna tatatugöi moloʼö si sagu khöda. Böi ha börö me oya mamuala ndraʼugö ba niha böʼö, lö tebönökhi zoguna ba nösi nomou.—Yobi 17:5.
Tandraigö falua daʼa: Kaoni fazamösa niha weʼamöi manga ba nomomö mazui ba wamadu idanö. Na so gama-gama si lö öʼogunaʼö, tola öbeʼe khö nawöu mazui si falazi omo khöu somasi mangogunaʼö.
Angeragö lala tanö böʼö ba wangoromaʼö faʼoböwö. Tenga ha kefe zi tola tabeʼe ba niha böʼö, hizaʼi so ösa zi tohude si tola tafalua. Duma-dumania, tola öbeʼe ginötö hegöi faʼabölömö ba wanolo niha böʼö. Baero daʼö, fehedemö tola göi tobali buala sebua böli daʼö! Andrö, fatunö ba niha böʼö wa öʼomasiʼö ba öʼameʼegö tödö ira.
Tandraigö falua daʼa: Tolo niha böʼö ba wohalöwögöigö halöwö yomo ba nomo, mangehaogö hadia ia, mazui tanö böʼönia. Sura kartu ucapan ba wangandrö saohagölö soroi ba dödö, faʼoheʼö pesan singkat khö zi fahuwu khöu hewaʼae ha ösofu duriania.
Na öforege wangalui lala ba wangoromaʼö faʼoböwö, hasambalö ösöndra waʼomuso dödö.