Ikaoni Ndraʼugö Lowalangi Enaʼö Tobali si Fahuwu Khönia

Omasi Lowalangi enaʼö tobali ndraʼugö si fahuwu khönia. Hadia no irai öʼangeraigö wa tola tobali ndraʼugö si fahuwu ba zi samösa Wondrege Zalawa sokhö tanö ba banua si yawa? Aberahamo, me föna lafotöi ia si fahuwu khö Lowalangi. (Yakobo 2:23) Ato niha böʼö nitötöi ba Zura Niʼamoniʼö ba si fahuwu khö Lowalangi göi ira ba fahöna howu-howu. Iadaʼa, ato niha ba zi sagörö ulidanö no tobali si fahuwu khö Lowalangi. Tola göi tobali ndraʼugö si fahuwu khö Lowalangi.

Tobali si fahuwu khö Lowalangi abölö sökhi moroi na tobali si fahuwu ba ngawalö niha. Lö irai ibeʼe ide-ide dödö dozi si fahuwu si lö faröi khönia Lowalangi. (Zinunö 18:26) Tobali si fahuwu khö Lowalangi abölö sökhi moroi ba ganaʼa. Ba ginötö waʼamate niha so anaʼa, anaʼania lahalö niha böʼö. Hizaʼi, fefu niha si no tobali si fahuwu khö Lowalangi ba so khöra gokhöta si tebai ihalö gofu haniha ia.​—Mataiʼo 6:19.

Te so hadauga niha latandraigö wanaha yaʼugö enaʼö böi öfahaʼö ndraʼugö waʼaboto ba dödö Lowalangi. Te lalau daʼö ira si fahuwu khöu ba mazui ira soroi yomou. (Mataiʼo 10:36, 37) Ba na so zangoʼaya ba ma sametaʼu yaʼugö, sofu ba gera-erau, ’Haniha zomasido uʼomusoiʼö tödö—niha ba ma Lowalangi?’ Angeraigö göi daʼa: Na so zanaha yaʼugö enaʼö öbato wemanga, hadia öʼoʼö niwaʼönia? Tatu manö löʼö! Moguna manga enaʼö auri. Ba Lowalangi zi tola mameʼe khöu faʼauri si lö aetu! Börö daʼö, böi manö tehegö gofu haniha ia wanaha yaʼugö enaʼö böi öfahaʼö ndraʼugö lala enaʼö tobali si fahuwu khö Lowalangi.​—Yohane 17:3.