Böi Tema Agama Selungu!

Satana ba malaʼikania lö omasi ira möi ndraʼugö enoni Lowalangi. Na tola, omasi ira na fefu niha laʼerogö Lowalangi. Hadia lala nilaura enaʼö alua zimanö? Sambua ba gotaluania yaʼia daʼö agama selungu. (2 Korindro 11:13-15) Latötöi ia agama selungu na agama daʼö lö ifahaʼö zindruhu moroi ba Zura Niʼamoniʼö. Agama selungu hulö simane kefe falasu—na mufaigi hulö gefe sindruhu, ba lö muʼila muʼogunaʼö ba wowöli hadia ia. Agama selungu tola iʼasogö khöu oya ngawalö gabula dödö.

Agama selungu lö irai iʼomusoiʼö dödö Yehowa, Lowalangi zindruhu. Me so Yesu ba gulidanö so sambua gorahua agama somasi mamunu yaʼia. Lawalinga agama nitöröra no atulö. Lamane wangumaʼö, ”Ha samösa Namama, Lowalangi.” Hadia fao dödö Yesu? Löʼö! Imane khöra, ”Moroi ba Gafökha ami, ba no edöna ami miʼoʼö waʼomasi namami andrö.” (Yohane 8:41, 44) Iadaʼa, ato niha lawalinga samosumange Lowalangi ira, sindruhunia ba no enoni Zatana ba malaʼikania ira!​—1 Korindro 10:20.

Hulö geu sobou ba iʼowua mbua si lö sökhi, agama selungu ifatumbuʼö niha solau ngawalö zi lö sökhi. Fahöna gabula dödö ba gulidanö andre börö ngawalö zi lö sökhi nilau niha. So gamuata faʼafaito, fatiusa, fanagö, famakao niha, fabunusa, ba fohorö. Ato niha solau si lö sökhi andre si so agama, hewaʼae simanö, agamara lö ifarou dödöra ba wamalua hadia zi sökhi. Tebai möi ira tobali si fahuwu khö Lowalangi, ha na labato wolau ngawalö zi lö sökhi.​—Mataiʼo 7:17, 18.

Agama selungu lafahaʼö niha ba wangandrö ba nadu. Itegu ita Lowalangi mangandrö ba nadu. Itema tödöda daʼa. Hadia omasi ndraʼugö na samösa niha lö irai fahuo-huo khöu, ha fahuo-huo ia ba gambarau? Hadia tola maö niha simane daʼö tobali si fahuwu khöu? Tebai. Omasi Yehowa enaʼö dozi niha fahuo-huo khönia. Tenga ba nadu ba ma ba gambara si lö noso.​—2 Moze 20:4, 5.

Agama selungu ifahaʼö wa lö fasala na labunu niha ba wasuwöta. Yesu zangumaʼö wa dozi si fahuwu khö Lowalangi faoma laʼomasiʼö nawöra. Lö tabunu niha niʼomasiʼöda. (Yohanes 13:35) Mamunu niha si lö sökhi fasala. Me tohare zi fatiu tödö khö Yesu ba wondraʼu yaʼia, lö itehegö ndra nifahaʼönia fasöndra ba wanolo yaʼia.​—Mataiʼo 26:51, 52.

Agama selungu ifahaʼö wa niha si lö sökhi tefakao ba galitö narako. Hizaʼi, Sura Niʼamoniʼö zamahaʼö wa luo horö ba faʼamate. (Roma 6:23) Yehowa ba no Lowalangi faʼomasi. Hadia Lowalangi si fahöna faʼomasi so maö ba dödönia wamakao niha irugi zi lö aetu? Tatu manö löʼö! Ba Waradaiso ha sambua agama, agama si faudu ba dödö Yehowa. (Famaʼeleʼö 15:4) Tehori dania fefu agama so dane-dane ba walimosa Zatana.