Hadia Zalua ba Ginötö Waʼamate Samösa Niha?

Faʼamate yaʼia daʼö lawa waʼauri. Niha si mate hulö simane niha si mörö. (Yohane 11:11-14) Niha si no mate lö tola irongo li, mamaigi, fahuo-huo ba ma mangera-ngera. (Zangombakha 9:5, 10) Agama selungu ifahaʼö wa niha si no mate möi ia ba zi sambua naha si lö oroma ba orudu ia khö ndra tuania si no mate. Tenga famahaʼö moroi ba Zura Niʼamoniʼö daʼa.

Niha si no mate tebai itolo, ba mazui ifaʼala ita. No si toʼölö niha wolau owuloa agama ba ma owuloa wamosumange nifaduhusi tödö wa owuloa daʼö tola mangomusoiʼö dödö niha si no mate. Lö omasi Lowalangi, börö me folau simanö modane-dane moroi ba ngawalö walimosa Zatana. Lö tola muʼomusoiʼö dödö niha si no mate, börö me lö faʼauri khöra saʼae. Lö moguna ataʼu ita ba niha si no mate ba ma tafosumange ia. Ha Lowalangi nifosumangeda.​—Mataiʼo 4:10.

Niha si no mate ba ifuli auri. Ba gulidanö faradaiso, isusugi niha si no mate Yehowa irege ifuli auri ira. Hizaʼi alua daʼa ba ginötö fönada. (Yohane 5:28, 29; Halöwö Zinenge 24:15) Tola isusugi niha si no mate Lowalangi, hulö simane na ösusugi niha si no mörö.​—Mareko 5:22, 23, 41, 42.

Fangera-ngera wa lö tola mate ita yaʼia daʼö falimosa nifazaewe Gafökha ba Satana. Satana ba malaʼikania labeʼe ba dödö niha wa lö mate noso niha si no mate ba tola iʼasogö wökhö ba ma abula dödö tanö böʼö. Ato niha ilimo Satana, itaria moroi ba wangifi ba angilata. Iʼelifi Yehowa dozi niha sangodödögö fahuo-huo ba niha si no mate.​—5 Moze 18:10-12.