FAOSATÖ 6
Lö Faröi Yobi khö Lowalangi
Iböbögö zi lö duhu Afökha khö Yobi föna Lowalangi, hizaʼi, lö faröi Yobi khö Yehowa
HADIA so niha gulidanö si lö faröi khö Lowalangi na göna khönia wanandraigö sabölö-bölö, awö wa lö monönö gokhötania me no iʼoʼö li Lowalangi? Daʼö nisofu-sofu niha—ba so wanema linia—ba zalua khö Yobi.
Me ba danö Miserai so nasa ndraono Gizaraʼeli, so samösa zi fahatö khö Gaberahamo sotöi Yobi, toröi ia ba mbanua sotöi Arab. Me luo daʼö, owulo ndra malaʼika föna Lowalangi, ba so göi Gafökha ba gotaluara. Ba waʼowulora ba zorugo andrö, ifatunö Yehowa waʼafaduhu dödönia khö genoninia si lö faröi Yobi. Imane Yehowa wa lö hadöi niha samati ba si lö faröi simane Yobi. Tobali, imane Afökha wa ifosumange Lowalangi Yobi börö me no tefahowuʼö ba me no telumöʼö ia. Moloʼö Afökha, na teheta gokhöta Yobi ba na tefakao ia, hasambalö iʼelifi Lowalangi.
Itehegö Yehowa khö Gafökha ba wanandraigö Yobi. Si oföna, tehori fefu gokhötania, aefa daʼö mate nononia, ba gafuriata ibeʼe wökhö bou auri khö Yobi. Börö me lö iʼila Yobi wa fanandraigö daʼö moroi khö Gafökha, manofu-nofu dödönia hana wa itehegö Lowalangi göna khönia wanandraigö andrö. Hewaʼae simanö, lö faröi ia khö Lowalangi.
Datölu zi fahuwu si lö sökhi zangondrasi Yobi. Ba wahuhuosara khönia si no tesura ba zura Yobi, lafaduhuʼö khö Yobi wa famakaonia andrö hukuma moroi khö Lowalangi, börö horö nifaluania si no tobini. Lamane wangumaʼö, lö omasi Lowalangi wamaigi ono mbanuania ba lö faduhu dödönia khöra. Itimbagö Yobi wangera-ngerara si lö atulö andrö. Imane Yobi khö ndra awönia andrö, lö faröi ndraʼo khö Lowalangi ofeta ba waʼamategu!
Hizaʼi, fasala Yobi börö me abölö iʼangeraigö hewisa wangoromaʼö faʼatulö dödönia. Itema lira Elihu ono matua sawuyu boto nasa si no mamondrongo fefu huhuora. Itegu Yobi börö me lö aboto ba dödönia wa famaduhuʼö faʼatulö Yehowa abölö sökhi moroi ba wamaduhuʼö faʼatulö dödö niha gulidanö. Itegu göi Elihu zi fahuwu khö Yobi.
Muhede Yehowa khö Yobi ba wamareso fangera-ngerania. Iʼandrö Yehowa khö Yobi ba wamaigi fefu sahöli-höli dödö niwöwöi dangania, itolo Yobi ba woʼangerönusi wa lö eluaha lakhömi niha moroi ba lakhömi Yehowa. Itema degu-degu Lowalangi Yobi fao fangide-ngideʼö. Me no ’sahakhö tödö Yehowa ba sebua faʼomasi’, ifadöhö wökhö Yobi, ifuli fefu gokhöta Yobi dua winaeta, ba ifuli tumbu khönia ndraono dafulu. (Yakobo 5:11) Börö me lö faröi Yobi khö Yehowa me göna ia fanandraigö, tola ibuʼa wehede Gafökha ba niha wa samösa lö hadöi niha si lö faröi khö Lowalangi na göna fanandraigö.
—Teʼodane-dane ba mbuku Yobi.