Iʼefaʼö Lowalangi Ndraono Gizaraʼeli

NO ARA toröi ndraono Gizaraʼeli ba danö Miserai, moʼokhöta ira ba monönö manö waʼatora. Hizaʼi, so Waraʼo sawena mamatörö si lö irai faʼila khö Yosefo. Me iʼila razo si lö sökhi andre itugu ato ndraono Gizaraʼeli, so khönia waʼataʼu ba tobali iʼosawuyu ndraono Gizaraʼeli, aefa daʼö, ibeʼe goroisa enaʼö latiboʼö nono matua sawena tumbu ba Luaha Nilo. Hizaʼi, so samösa ndra alawe si lö ataʼu, ibiniʼö nononia ono matua ba wetifeti sukhu ba ibeʼe barö zukhu ba mbewe Nilo. Lasöndra nono andre ono alawe Waraʼo, labeʼe töinia Moze, ba laʼebuaʼö ia ba gotalua nösi nomo razo Miserai.

Me no 40 fakhe Moze, göna ia abula dödö börö me no iʼoʼawögö ndraono Gizaraʼeli nibözi zaradadu ndrawa Miserai. Aefa daʼö, moloi Moze ba danö saröu ba tobali si fatewu ia ba daʼö. Me no irugi 80 fakhe ndröfi Moze, ifatenge ia Yehowa ba danö Miserai ba wamalukhaisi Faraʼo, enaʼö iʼefaʼö nono mbanua Lowalangi.

Ba lö itehegö Faraʼo. Andrö wa ibeʼe wamakao si fulu Lowalangi. Ero möi Moze ba wamalukhaisi Faraʼo, tebeʼe ginötö khönia enaʼö teʼefaʼö ira ba wamakao andrö, tobali lö omasi Waraʼo, iʼosiwawöi niwaʼö Moze hegöi Yehowa. Ba gafuriata tohare wamakao si fulu, mate ziaʼa nono matua ba mbanua andrö—tobali lö mate niha soloʼö khö Yehowa si no mameʼe do nono mbiri-biri ba högö mbawandruhö nomora. Lataluʼi nomo andrö ira malaʼika solohe famakao. Andrö ero röfi lafalua Gowasa Fasa ba wanörö tödö fangorifi nibeʼe Yehowa khöra.

Me no mate nono matua siaʼa khö Waraʼo, awena ifofanö Moze awö ndraono Gizaraʼeli moroi ba danö Miserai. Mofanö ndraono Gizaraʼeli laröi danö Miserai. Ifuli tebulö wangera-ngera Waraʼo. Igohi ndraono Gizaraʼeli iʼohe ndra saradadunia iʼogunaʼö gureta wasuwöta. Teʼuʼu ndraono Gizaraʼeli ba zinga Nasi Sukhu. Ifabali Yehowa Nasi Sukhu irege tola latörö iraono Gizaraʼeli hulö danö sabeʼe! Me lagohi ira dawa Miserai, ilömö ira Lowalangi ifangawuli nasi ba nahiania ba ahöndrö Waraʼo faoma saradadunia ba Nasi Sukhu.

Aefa daʼö, me lafazökhi nosera iraono Gizaraʼeli ba gahe Hili Sinaʼi, fawuʼu li Yehowa khöra. Ifaʼema khö Moze goroisania Lowalangi enaʼö iʼombakhaʼö ba ndraono Gizaraʼeli si tobali fanuturu lala ba waʼaurira. Na lö faröi ira ba wamatörö Lowalangi, irorogö ira Yehowa ba tobali ira soi sebua ba tefahowuʼö ira.

Alimagö sibai me ato ba gotalua ndraono Gizaraʼeli zi lö mamati khö Lowalangi. Andrö, ihuku ira Yehowa ba wanöröi tanö simate 40  fakhe waʼara. Aefa daʼö, ibeʼe Moze halöwö khö Yosua ba wanohugö halöwönia andrö. Ba gafuriata, iraono Gizaraʼeli lafaʼanö ira weʼamöi ba danö si no ifabuʼu Yehowa khö Gaberahamo.

​—Teʼodane-dane ba II Moze; III Moze; IV Moze; V Moze; Zinunö 136:10-15; Halöwö Zinenge 7:17-36.