Hana wa la Fotöi Ndraʼaga Samaduhuʼö Yehowa?

Ato niha sangumaʼö Samaduhuʼö Yehowa andrö töi agama sibohou. Tobali, töra 2.700 fakhe ba zilalö, banua Lowalangi sindruhu si ha sambua lafotöi ira samaduhuʼö khönia. (Yesaya 43:10-12) Irugi me döfi 1931, lafotöi ndraʼaga Ono Zekola ba Daromali Lowalangi. Hana wa bagafuriata maʼogunaʼö döi Samaduhuʼö Yehowa?

Töi andrö zangoromaʼö haniha Lowalangima. Moloʼö buku nisura ba götö föna, töi Lowalangi yaʼia daʼö Yehowa, tesöndra ngahönö wa oya ba Zura Niʼamoniʼö. Ba zi hawaʼoya mbuku Niʼamoniʼö si no lafoʼeluaha, töi daʼö no lafalalini la beʼe döi, simane Lowalangi ma Soʼaya. Tobali, me fahuhuo Lowalangi khö Moze, iʼombakhaö haniha döinia si ndruhu, Yehowa, ba imane ”Daʼö wamotöi yaʼo götö-götö waʼara.” (II Moze 3:15) Töi andre zamaböʼöni yaʼia moroi ba Lowalangi tanö böʼö. Omuso dödöma me maʼotöigö döi Lowalangi niʼamoniʼö.

Töi andrö zangombakha hadia geluaha halöwö nifaluama. Ato niha ba götö föna, iʼotarai Habeli niha satulö tödö, lafaduhuʼö wa mamati ira khö Yehowa. Me itugu ara, Noakhi, Aberahamo, Saraʼi, Moze, Dawido, ba ato danö böʼö nasa fao ira tobali ”lawuo samaduhuʼö” andre. (Heberaiʼo 11:4–12:1) Hulö niha simöi samaduhuʼö föna zamatörö huku ba wangoʼawögö niha si lö sala, simanö göi ndraʼaga mahalö gangetula wangombakha si ndruhu sanandrösa khö Lowalangima.

Maʼoʼö duma-duma niröi Yesu. Ba Zura Niʼamoniʼö, lafotöi ia ”Samaduhuʼö si lö faröi ba Siduhu.” (Famaʼeleʼö 3:14) Yesu samösa zangumaʼö wa ’no iʼombakhaʼö döi Lowalangi,’ lö iböhöli ”Ifaduhuʼö zi duhu” sanandrösa khö Lowalangi. (Yohane 17:26; 18:37) Börö daʼö, niha keriso si ndruhu laʼotöi ba laʼombakhaʼö döi Yehowa. Daʼö niʼodödögö nifalua ndra Samaduhuʼö Yehowa.

• Hana wa Ono Zekola Daromali Lowalangi ba gafuriata la fotöi ira Samaduhuʼö Yehowa?

• Hamega ibörötaigö so zamaduhuʼö khö Yehowa ba gulidanö?

• Haniha zi föföna zamaduhuʼö Yehowa?