Hadia Mbörö wa Mahaogö Wonukha Namöi ba Gangowuloa?

Hadia no öʼila ndra Samaduhuʼö Yehowa ba gambara andre? Ha waʼasökhi wonukhara namöi ira ba gangowuloa niha Keriso. Hana wa maʼameʼegö tödö sibai wangehao fonukha andrö?

Ba wangoromaʼö wa maʼataʼufi Lowalangima. Hewaʼae simanö, tenga faʼasökhi mboto nifaigi Lowalangi. (I Samueli 16:7) Hizaʼi, ba ginötö owulo ndraʼaga ba wamosumange Lowalangi, omasiga maʼoromaʼö wa maʼataʼufi Lowalangi ba ma osinangegö nawöma sisara lala wamati. Namöi ita taʼondrasi samösa zanguhuku ba gödo, tatu manö wa tahaogö wonukhada börö metaʼila alawa fakania. Simanö göi, namöi ndraʼaga ba gangowuloa wamosumange Lowalangi, mahaogö wonukhama. Daʼö zangoromaʼö wa maʼataʼufi ”zanguhuku ulidanö maʼasagörö”, Lowalangi Yehowa, hegöi nahia gangowuloama.​—I Moze 18:25.

Ba wangoromaʼö angetula si no mahalö ba waʼaurima. Sura Niʼamoniʼö zamarou tödö niha Keriso ba wonukha ”soadu” ba fangera-ngera si sökhi ba sinangea ”ba zangataʼufi Lowalangi”. (I Timoteo 2:9, 10) Fonukha ”soadu” eluahania böi tafake nukha si tobali fangoʼaya ma soroma-roma ösi. Simanö göi, ”wangera-ngera si sökhi” daʼö zanolo yaʼaga ba wofili nukha soadu famaigi, si lö fawuka mazui nukha si lö moadu famaigi. Hewaʼae maʼoʼö goi-goi daʼa, oya nasa nukha si tola ma fake. Börö wonukha si sökhi ba soadu, tola ”moturia si sökhi lala Lowalangi sangorifi yaʼita” ba ”tefolakhömi ia”. (Dito 2:10; I Fetero 2:12) Na mafake nukha soadu weʼamöi ba gowuloa wamosumange Lowalangi, tedönisi dödö niha ba wamosumange Yehowa.

He na lö hadöi khöu nukha sebua böli, böi aila ndraʼugö weʼamöi ba Nahia Gorahua Ndra Samaduhuʼö Yehowa. Tenga ha nukha sebua böli zoadu ba si sökhi famaigi.

• Hana wa moguna tahaogö wonukha namöi ita wamosumange Lowalangi?

• Hadia manö goi-goi zanolo yaʼita ba wofili nukha si sökhi ba soadu?