Hewisa Zatua Sokubaloi Weʼamöi Enoni Nono Mbanua Lowalangi?

Ba gangowuloama, lö fandrita sinangea mugazi. Hizaʼi, simane angowuloa niha Keriso si föföna, ira talifusö sinangea mangai halöwö tefataro ira ”ba wokubaloi banua zoʼaya”. (Halöwö Zinenge 20:28) Ira satua sokubaloi andre yaʼia daʼö ira matua saro ba wamati si so halöwö ba gangowuloa ba wokubaloi rorogöfö Lowalangi ”tenga niʼoʼou ira enaʼö saohagölö [föna Lowalangi]; tenga ba wangalui luo saila ita, enaʼö na moroi ba waʼomasi”. (I Fetero 5:1-3) Hadia nifaluara khöma?

Larorogö ndraʼaga. Ira satua sokubaloi labeʼe wanuturu lala ba nono mbanua Lowalangi ba lalumöʼö ba wamati. Börö meʼaboto ba dödöra wa moroi khö Lowalangi halöwö andre, ira satua sokubaloi lö lafatörö nono mbanua Lowalangi; tobali, laʼodödögö enaʼö omuso dödöma ba wamati. (II Korindro 1:24) Simane kubalo sangodödögö ba wondrorogö biri-birinia, simanö göi ndra satua sokubaloi laʼodödögö wamaigi-maigi ono mbanua Lowalangi.​—Gamaedola 27:23.

Lafahaʼö ndraʼaga ba wamalua somasi Lowalangi. Ero migu, lafahaʼö ndraʼaga ira satua sokubaloi ba gangowuloa enaʼö aro wamatima. (Halöwö Zinenge 15:32) Talifusöma ira matua si lö faröi andre, ladöniaʼö ndraʼaga ba wanuriaigö, falulu fohalöwö ira khöma ba lafahaʼö ndraʼaga ba ngawalö halöwö wanuriaigö.

Lafarou dödöma zamösana. Ba wamönökhi soguna ba wamatima zamösana, ira satua sokubaloi itaria laʼondrasi ndraʼaga ba nomo mazui ba Nahia Gorahua Mbanua Lowalangi ba wameʼe khöma fanolo ba fondrara dödö ba Zura Niʼamoniʼö.​—Yakobo 5:14, 15.

Baero halöwöra bakha ba gangowuloa niha Keriso, ato ndra satua sokubaloi sangogunaʼö inötö ba laʼameʼegö tödö göi wohalöwö ba wangalui soguna ba nösi nomora. Ira talifusö si no erege tödö andre sinangea mufosumange ira.​—I Tesalonika 5:12, 13.

• Hadia halöwö ndra satua sokubaloi ba mbanua niha Keriso?

• Hewisa wangoromaʼö ndra satua sokubaloi wa laʼonorogö tödö ndraʼaga?