Hewisa Zatua Samasui Wanolo Yaʼaga?

Ba gamabuʼula li si bohou asese latötöi döi Mbaranaba ba Faulo. Yaʼira andre lahalö halöwö zatua simöi ba mbanua niha Keriso si föföna. Hadia mbörö? Börö me laʼonorogö tödö zoguna khö ndra talifusöra ba wamati. Imane Faulo, omasi ia ”ifuli  ifaigi ndra talifusö” enaʼö iʼila hewisa ira. Itaögö wanörö lala si töra ngaotu kilo waʼaröu ba wamarou tödö ndra talifusönia. (Halöwö Zinenge 15:36) Simanö göi zatua samasui omasi ira lafalua halöwö simane daʼö.

Laʼondrasi ndraʼaga ba wamarou tödöma. Ero samösa zatua samasui möi ia ba zi 20 banua niha keriso, ero sambua banua niha keriso toröi ira ba daʼö samigu waʼara dua kali ba zi döfi. Tola tefarou dödöma na ladunö-dunö hadia zi no latörö ba wofanö-fanöra misa na manuriaigö hegöi foʼomora ira alawe na si no mangowalu. Laʼodödögö sibai wangiʼila hewisa ero samösa nono mbanua Lowalangi he iraono he satua ba gangowuloa, la ameʼegö tödö sibai wefao khöma ba wanuriaigö ba bawamahaʼö niha ba Zura Niʼamoniʼö. Yaʼira andre fao ira khö ndra satua sokubaloi ba wokubaloi ono mbanua Lowalangi. Ba wamarou tödöma, lafaʼema huhuo ba mamahaʼö ira ba gangowuloa side-ide hegöi ba gangowuloa sebua.—Halöwö Zinenge 15:⁠35.

Laʼameʼegö tödö fefu ndra talifusö. Ira satua samasui omasi ira na tedou wamati ndra talifusö. Lafalua rafe si fao ira satua sokubaloi ba enoni ba wamaigi faʼatedou halöwö si no lafalua ba latuturu lala si sökhi ba wamalua halöwö ba gangowuloa. La tolo göi ndra perintis enaʼö mowua halöwöra ba wanuriaigö. Omasi ira göi faʼila khö ndra talifusö sawena möi ba gangowuloa ba la fondro-ndrongo hewisa waʼatedoura ba wamati. Ira talifusö andre laʼodödögö weʼamöi ”awöma wohalöwö”. (II Korindro 8:23) Famati ba folulu faʼaurira khö Lowalangi sinangea tobali duma-duma.—Heberaiʼo 13:⁠7.

• Hadia gohitö dödö ndra satua samasui wa lafuli lafaigi zi sambua angowuloa?

• Hadia gunania khöu me no laʼondrasi ndraʼugö?