Hadia Nifotöi Mbetieli Andrö?

Nifotöi ”Mbetieli” moroi ba li Heberaiʼo ”Omo Lowalangi”. (I Moze 28:17, 19) Tefaudu sibai döi daʼe ba nahia nifasindro ndra Samaduhuʼö Yehowa ba zi sagörö ulidanö niʼogunaʼö ba wondrouʼö halöwö fanuriaigö. Satua Sangai Halöwö mohalöwö ira ba gödo si so ba mbanua New York, AS, ba lafaigi-faigi halöwö nifalua ba ngawalö soi. Fefu zohalöwö ba gödo andre lafotöi ira ösi nomo Mbetieli. Amaedola zi sambua omo ira falulu fohalöwö, fao ira wemanga, ba faoma lafahaʼö ira ba Zura Niʼamoniʼö, ba so khöra wahasara dödö.​—Zinunö 133:1.

Nahia si sökhi ba zi sambua omo sohalöwö si lö gazi. Ira matua ba ira alawe sohalöwö ba Mbetieli no latehegö ginötöra ba wamalua somasi Lowalangi ba halöwö nifaluara si tefaudu ba gohitö dödö Lowalangi. (Mataiʼo 6:33) Lö hadöi mugazi ira hizaʼi lahenaigö nahia wemörö, niʼa, ba so maʼifu wanolo ba wombönökhi soguna khöra. Niha si so ba Mbetieli so halöwöra zamösana, so zohalöwö ba gödo, so göi zondrino gö, so zohalöwö ba wamazökhi buku, ba wamaʼanö, so göi zohalöwö ba wangehaogö nahia, sanasa nukha, ba oya nasa danö böʼönia

Oya halöwö ba nahia andrö ba wondrouʼö halöwö fanuriaigö. Si föföna gohitö dödö ero sambua Mbetieli yaʼia daʼö ba wangombakha si ndruhu ba Zura Niʼamoniʼö ba niha fefu. Sa mbua duma-duma mbuku andre. Me no latehegö Satua Sangai Halöwö ba wosura, awena lafaʼoheʼö ba niha samoʼeluaha ba zi töra ngaotu waʼatora ba zi sagörö ulidanö, laʼogunaʼö fakake salio ba wamazökhi yaʼia, ba awena lafaʼoheʼö ba zi 110.000 angowuloa. Fefu nifalua no mege, so halöwö ba Mbetieli la lului halöwö fondrege zaösö andrö —manuriaigö turia somuso dödö.​—Mareko 13:10.

• Haniha zohalöwö ba Mbetieli, ba hadia zi no lahenaigö khöra?

• Hadia halöwö saösö ni lului zohalöwö ba Mbetieli