Omuso Dödöda Na Taʼila Huhuo si Tobini

Hadia no irai örongo huhuo si tobini?​—a So huhuo si tobini ba Zura Niʼamoniʼö. Töinia ”si tobini niʼamoniʼö”. Lafotöi ia si tobini börö me samösa lö sangila ba mböröta. Ba lafotöi ia niʼamoniʼö, börö me moroi khö Lowalangi. Omasi ndra malaʼika laʼila hadia huhuo so tobini andrö. Hadia omasi ndraʼugö öʼila göi?​—

Ba götö meföna, ifazökhi Lowalangi ndra matua ba ira alawe si föföna. Töira Adamo ba Khawa. Tebeʼe khöra nahia si sökhi nifotöi Kabu Edena. Na laʼoʼö li Lowalangi, yaʼira ba ngaʼötöra tola labaliʼö faradaiso si sökhi zi sagörö ulidanö. Ba ba daʼö monahia ira. Hizaʼi, hadia nifalua Gadamo ba Khawa?​—

Lö laʼoʼö li Lowalangi ira Adamo ba Khawa. Andrö wa tenga ba Waradaiso so ita iadaʼa. Hizaʼi, imane Lowalangi, ifuli ifazökhi gulidanö andre dania simane Faradaiso, ba fefu niha sauri ba daʼö ohahau dödöra. Hewisa wamalua Lowalangi daʼö? Ngahönö fakhe ba zilalö samösa lö sangila fanema li, börö me lö niʼombakhaʼö nasa.

Me möi Yesu ba gulidanö, no ifatunö huhuo si tobini andrö ba niha böʼö. Imane, famatörö Lowalangi dania zombaliʼö ulidanö andre tobali Faradaiso. Andrö wa ifarou ita Yesu ba woʼangandröi Banua Lowalangi enaʼö alio tohare.

Hadia omuso dödöu me no öʼila huhuo si tobini andrö?​— Böi olifuʼögö, ha niha soloʼö khö Lowalangi zi tola auri ba Waradaiso. Oya waö-waö waʼauri zoloʼö khö Lowalangi nidunö-dunö ba Zura Niʼamoniʼö. Hadia omasiʼö öʼila waö-waö waʼaurira?​— Datafaigi haniha manö ira ba hewisa lalada ba woloʼö amuatara.