FAMAHAʼÖ 2
Omasi Rebeka Wangomusoiʼö Tödö Yehowa
Rebeka, ira alawe sangomasiʼö Yehowa. Töi woʼomonia Izaʼaki, sangomasiʼö Yehowa. Hamega falukha Gizaʼaki khö Rebeka? Hadia dandra wa iʼomusoiʼö dödö Yehowa? Databaso waö-waönia.
Izaʼaki ono Gaberahamo ba Saraʼi. Ba danö Ganaʼana toröi ira, ba gotalua niha si lö mamosumange Yehowa. Andrö wa lö omasi Gaberahamo na mangowalu Gizaʼaki ba Ndrawa Ganaʼana. Iʼoʼou zawuyunia sotöi Eliezeri weʼamöi ba Harana ba zi so talifusönia, ba wangalui ono alawe foʼomo Gizaʼaki.
Ifangörö-ngörö ia Rebeka wanaʼu idanö ö gondra
Mofanö ndra Eliezeri faoma sawuyu tanö böʼö. Aröu danö laʼofanöi. Laʼohe fulu ngaʼeu gondra ba wonoro gama-gamara awö mbualara. Hewisa enaʼö iʼila Geliezeri haniha nono alawe si sökhi bua-bua si tobali foʼomo Gizaʼaki? Molombase ira ba Harana ba ngai mbaʼa, börö me laʼila wa ato niha sanaʼu idanö ba daʼö. Ba mangandrö Geliezeri khö Yehowa imane, ’Ba na uʼandrö dania nidanö khö nono alawe sanaʼu idanö, ba na ibeʼe ögu nidanö ba ö gondragu göi, daʼö nono alawe nihonogöimö khö genoniu Izaʼaki.’
Lö ara aefa daʼö, möi Rebeka ba mbaʼa andrö. Si sökhi bawa ia iwaʼö Sura Niʼamoniʼö. Iʼandrö khönia nidanö Eliezeri, ba imane ono alawe andrö, ’Lau, badu tua. Da utaʼu-taʼu göi ö gondra khöu.’ Khalaigö atö! Ogoya sibai mamadu idanö gondra, ba ifangörö-ngörö ia Rebeka ba wanaʼu idanö öra. Faigi atö gambara andre. Owölö-ölö sibai ia lö?— Omuso sibai dödö Geliezeri me no ifondro-ndrongo wangandrönia Yehowa.
Aefa daʼö, ibeʼe mbuala Eliezeri khö Rebeka, ba iʼohe ira Rebeka ba nomo enaʼö falukha khö ndra talifusönia. Ifatunö Eliezeri hana wa möi ira ba Harana. Aefa daʼö imane, Rebeka andre nifili Yehowa tobali foʼomo Gizaʼaki. Omuso dödö nösi nomo Rebeka ba latehegö mangowalu ia khö Gizaʼaki.
Fao Rebeka khö Geliezeri ba danö Ganaʼana, ba mangowalu ia khö Gizaʼaki
Moloʼö yaʼugö, hadia omasi Rebeka mangowalu khö Gizaʼaki?— Iʼila Rebeka wa Yehowa zanuturu lala khö Geliezeri. Andrö, me lasofu khö Rebeka ira talifusönia hadia edöna möi ia ba Ganaʼana ba mangowalu khö Gizaʼaki, itema li, ’E, edönado’. Ba mofanö Rebeka fao ia khö Geliezeri. Me no larugi danö Kanaʼana, mangowalu Rebeka khö Gizaʼaki.
Börö me iʼomusoiʼö dödö Yehowa Rebeka, ifahowuʼö ia Yehowa. Andrö, ba ngaʼötönia tumbu Yesu! Na öʼomusoiʼö dödö Yehowa simane Rebeka, ifahowuʼö ndraʼugö Yehowa.