Yosia Faoma si Fahuwu Khönia

Hadia no irai abua khöu wamalua si sökhi?​— Ato niha zorasoi simane daʼö. Idunö-dunö khöda Sura Niʼamoniʼö waö-waö Yosia, abua sibai khönia wamalua si sökhi. Hizaʼi, so zi fahuwu khönia zanolo yaʼia. Databaso waö-waöra.

Yosia andrö ono razo niha Yehuda sotöi Amoni. Lö sökhi gamuata razo Gamoni. Ifosumange nadu. Me mate ia, tobali razo nononia Yosia fangalinia. Awena ŵalu fakhe ia meluo daʼö! Moloʼö yaʼugö, hadia iʼoʼö gamuata namania ba waʼalösökhi?​— Löʼö!

Yosia andrö ono soloʼö li Yehowa iʼotarai meʼide-ide ia. Ha ba niha sangomasiʼö Yehowa fahuwu ia. Ba latolo ia si fahuwu khönia ba wamalua si sökhi. Haniha manö zi fahuwu khö Yosia andrö?

Yaʼia daʼö Zefania. Samaʼeleʼö göi ia. Asese ifangelama niha enaʼö böi lafosumange nadu, faböi alau ira ba wangala. Yosia, ifondro-ndrongo niwaʼö Zefania. Yehowa nifosumangenia tenga adu.

Si fahuwu khönia tanö böʼö yaʼia daʼö Yeremia. Arakhagö fagölö ndröfira, ba fahatö nomora. Fahuwu sibai ira. Me mate Yosia, ihaogö sambua ngenu-ngenu Yeremia ba wanörö tödö nifalua Yosia. Yosia ba Yeremia faoma latolo nawöra ba wamalua si sökhi ba woloʼö niwaʼö Yehowa.

Hadia zi tola öʼoʼö ba nifalua Yosia?​— Omasi Yosia woloʼö niwaʼö Yehowa iʼotarai waʼide-idenia. Ha ba niha sangomasiʼö Yehowa fariawö ia. Andrö, fariawö ba niha sangomasiʼö Yehowa ba ba niha sanolo yaʼugö ba wamalua si sökhi!