FAMAHAʼÖ 9
Lö Ibato Yeremia Wamatunö Sanandrösa khö Yehowa
Hana wa mofönu niha khö Yeremia?
Börö wanolo Yehowa, teʼorifi Yeremia
So niha si lö omasi na tadunö-dunö khöra sanandrösa khö Yehowa. Laʼoʼaya ita ba mofönu ira khöda. Daʼö wa tola ataʼu ita wamatunö sanandrösa khö Yehowa. Hadia no irai örasoi zimane daʼö?— So waö-waö nono matua si bohou ebua sotöi Yeremia nidunö-dunö ba Zura Niʼamoniʼö. Iʼomasiʼö sibai Yehowa, hizaʼi, no irai arakhagö ibato wamatunö Taromali Yehowa. Databaso waö-waönia.
Me awuyu-wuyu Yeremia, iʼoʼou ia Yehowa ba wamangelama niha enaʼö labato wamalua si lö sökhi. Abua khö Yeremia wamalua daʼö. Ba ataʼu ia. Imane khö Yehowa, ”Lö uʼila fahuhuo, me iraono na ndraʼodo.” Ba imane khönia Yehowa, ”Böi ataʼufi ira, utolo ndraʼugö.”
Ibörötaigö ifangelama niha Yeremia, na lö lafalalini gera-erara ba tehuku ira. Moloʼö yaʼugö, hadia laʼoʼö niwaʼö Yeremia niha andrö?— Löʼö. Laʼoʼaya ia, ba mofönu ira khönia. So göi zomasi mamunu yaʼia! Moloʼö yaʼugö, hewisa dödö Yeremia meluo daʼö?— Ataʼu sibai ia. Imane, ’Lö ufaʼema saʼe niwaʼö Yehowa.’ Hadia si ndruhu-ndruhu ibato wamaʼema niwaʼö Lowalangi?— Löʼö, lö ibato. Iʼomasiʼö sibai Yehowa, andrö wa lö ibato wamatunö oroisa Yehowa. Börö daʼö, ilumöʼö ia Yehowa.
Duma-dumania, so niha si lö sökhi saniboʼö Yeremia ba dögi si so tambu. Lö labeʼe gönia ba lö labeʼe önia nidanö. Laröi manö Yeremia ba daʼö enaʼö mate ia. Hizaʼi, itolo ia Yehowa, lö mate ia!
Hadia zi tobali famahaʼö khöu ba waö-waö Yeremia andre?— Hewaʼae ataʼu Yeremia, lö ibato wamatunö Taromali Yehowa. Tola göi öfalua zimane daʼö. So zangoʼaya yaʼugö ba sofönu khöu na öfatunö Daromali Yehowa irege aila ba ataʼu ndraʼugö. Tobali, böi bato wanuriaigö. Itolo ndraʼugö Yehowa simane fanolonia Yeremia.