FAMAHAʼÖ 11
Lasura Waö-waö Waʼauri Yesu
Hadia öʼila haniha zi so ba gambara andre?— Töira yaʼia daʼö, Mataiʼo, Mareko, Luka, Yohane, Fetero, Yakobo, Yuda, ba Faulo. Ba götö Yesu auri ira, ba yaʼira zanura waö-waö waʼauri Yesu ba Zura Niʼamoniʼö. Datafahaʼö ita ba zanura waö-waö Yesu andre.
Hadia zi no aboto ba dödöu khö ndra niha daʼa?
Datölu ba gotalua zanura Sura Niʼamoniʼö andre zi no irai fao khö Yesu ba wanuriaigö. Haniha döira?— Mataiʼo, Yohane, ba Fetero. Mataiʼo faoma Yohane zabölö fahuwu khö Yesu, ba faoma lasura waö-waö waʼaurinia. Yohane zanura buku Wamaʼeleʼö, hegöi buku I Yohane, II Yohane, III Yohane. Fetero zanura buku I Fetero ba II Fetero. Isura Fetero ba zurania si mendrua wa no irai fahuhuo Yehowa khö Yesu moroi ba zorugo imane, ’Onogu daʼö, ono omasiʼögu.’
Baero ira, so nasa niha böʼö sanura waö-waö waʼauri Yesu ba gambara andre. Yaʼia daʼö Mareko. Iʼila Mareko hadia zalua me laraʼu Yesu börö me so ia ba daʼö. Tanö böʼö yaʼia daʼö Luka. Yaʼia andre doto. Te awena tobali ia niha Keriso me no mate Yesu.
Daruatö danö böʼö sanura waö-waö Yesu si so ba gambara andre yaʼia daʼö akhi Yesu. Haniha döira?— Yakobo ba Yuda. Lö faduhu dödöra khö Yesu ba wamobörö, lamane owöhö Yesu. Tobali ba gafuriata, awena mamati ira khö Yesu ba laʼoʼö ia.
Safuria zanura waö-waö Yesu niʼilamö ba gambara andre yaʼia daʼö Faulo. Fatua lö tobali ia niha Keriso, Saulo döinia. Fatuwu sibai ia niha Keriso, igohi-gohi ira. Hadia öʼila hana wa tobali niha Keriso Waulo?— Samuza maʼökhö, möi Waulo ba mbanua Ndramaseko. Ba zi lö mudöna-döna so zihede moroi ba zorugo. Yaʼia daʼö Yesu! Imane khö Waulo, ’Hana wa ögohi-gohi zoloʼö khögu?’ Me no aefa alua daʼö, ifalalini gera-erania Faulo tobali ia niha Keriso. 14 ngawua mbuku nisura Waulo iʼotarai mbuku Roma irugi mbuku Heberaiʼo.
Ero maʼökhö tabaso Zura Niʼamoniʼö lö?— Na tabaso Zura Niʼamoniʼö, taʼila waö-waö waʼauri Yesu. Hadia omasiʼö öʼila nasa sanandrösa ba waʼauri Yesu?—