Lö Omasi Ira Mangalulu

Lö ara me no mangifi Razo Nebukanesa sanandrösa ba nadu, ifazökhi nadu sebua sibai moroi ba ganaʼa. Ba daʼö ibeʼe nadu andrö ba Danö Saloʼo Dura. Iʼandrö fefu khö ndra niha sohalöwö enaʼö owulo ira ba daʼö, fao Zaderakhi, Mezakhi ba Abedonego. Ibeʼe fareta razo, ’Na mirongo li dorofe, harafa, ba gofu hadia ia zoli, enaʼö miʼangalulu ba nadu andrö! Haniha zi lö mangalulu ba lafazaumba ia ba galitö.’ Hadia mangalulu ndraono matua si datölu andrö ba nadu daʼö mazui ha khö Yehowa mangalulu ira?

Lö ara, ifaretakö razo enaʼö lafoli musik. Fefu niha mangalulu ira ba nadu andrö, hizaʼi Saderakhi, Mezakhi ba Abedonego lö mangalulu ira. Niha sangila yaʼira lafatunö khö razo lamane, ’Ono matua si datölu andrö, lö mangalulu ira ba nadu nifazökhimö Tua.’ Ikaoni ira razo imane khöra, ’Ubeʼe khömi ginötö sakali tö. Na lö mangalulu ami, ba ufazaumba ami ba galitö. Lö hadöi lowalangi si tola mangorifi yaʼami.’ Lamane, ’Böi beʼe saʼae khöma ginötö Tua. Tola iʼefaʼö ndraʼaga Lowalangima. Na lö iʼefaʼö ndraʼaga, hasambalö lö mangalulu ndraʼaga ba nadu daʼö.’

Mofönu sibai Nebukanesa. Imane ba niha sohalöwö khönia, ’Miʼebuakö nasa galitö ba naha wanunu andrö, fitu kali faʼaukhu!’ Aefa daʼö, iwaʼö khö ndra saradadu, ’Miböbö ndra niha daʼa ba mifazaumba ira ba galitö!’ Talafo aukhu saʼae naha galitö andrö irege akhozi ndra saradadu samazaumba yaʼira. No lafazaumba bakha ba galitö ndraono matua si datölu. Hizaʼi, iʼila razo so daöfa niha sofanö-fanö bakha ba galitö. Izumaigö ataʼu ia ba manofu ia khö ndra sohalöwö sebua faka, ’Hadia tenga ha datölu mege nifazaumbada ba galitö? Hana izumaigö daöfa ira, si samösa daʼö hulö malaʼika!’

Ifahatö ia Nebukanesa ba galitö andrö ba muʼao ia, ’He yaʼami enoni Lowalangi Fondrege Zalawa, miʼaeʼe baero!’ Lö ara, möi ira baero. Maʼifu lö sesokho ira. Lö sakhozi gulira hegöi bu awö mbaru nibeʼe khöra, ba lö hadöi aböu alitö mbotora. Ahöli-höli dödö niha fefu.

Imane Nebukanesa, ’Sindruhu-ndruhu wa sabölö Lowalangi Zaderakhi, Mezakhi ba Abedonego. Ifatenge malaʼika ba wangefaʼö yaʼira. Lö hadöi lowalangi simane Lowalangira.’

Simane iraono matua si datölu andrö, hadia lö faröi ndraʼugö khö Yehowa gofu hadia zalua?